Ираны шинэ удирдагч Ормузын хоолойг тодорхойгүй хугацаагаар хаахаа мэдэгдэв
Ираны шинэ Дээд удирдагч Можтаба Хаменеи албан тушаалдаа очсоноос хойшх анхны мэдэгдлээ хийж, стратегийн ач холбогдолтой Ормузын хоолойг тодорхойгүй хугацаагаар хаалттай хэвээр үлдээхээ амлалаа. Тэрээр 2026 оны 3 дугаар сарын 12-13-ны өдрүүдэд дамжуулсан илгээлтдээ АНУ болон Израилийн Ираны эсрэг явуулж буй цэргийн ажиллагаа бүрэн зогсох хүртэл дэлхийн эрчим хүчний гол зангилаа болсон уг усан замыг нээхгүй гэдгээ хатуу мэдэгдсэн байна.
2026 оны 2 дугаар сарын 28-нд АНУ болон Израилийн агаарын цохилтын үеэр амиа алдсан Дээд удирдагч Али Хаменеигийн хүү Можтаба Хаменеи ийнхүү залгамжлагчаар тодорсон юм. Шинэ удирдагч олон нийтэд биечлэн харагдаагүй бөгөөд түүний мэдэгдлийг Ираны төрийн телевизийн нэвтрүүлэгч уншиж танилцуулжээ. Можтаба Хаменеи өөрөө дайны эхний цохилтын үеэр хөнгөн шархадсан гэх мэдээлэл байгаа бөгөөд тэрээр "Ормузын хоолойг хаах хөшүүргийг заавал ашиглах ёстой" хэмээн онцолсон байна.
Цэргийн стратегийн хүрээнд Ираны тал бүс нутгийн орнуудад хандан АНУ-ын цэргийн баазуудыг нэн даруй хаахыг уриалж, эдгээр байршлууд руу үргэлжлүүлэн цохилт өгөхөө анхааруулав. Түүнчлэн дайсны талын эмзэг цэгүүдийг онилсон "шинэ фронтууд" нээх боломжийг судалж байгаагаа дурджээ. Мөн дайны явцад учирсан хохирлыг дайснуудаасаа нөхөн төлүүлэх, хэрэв татгалзвал тэдний хөрөнгө ошгийг хураах эсвэл устгах хатуу байр суурьтай байгаагаа илэрхийлсэн байна.
Ормузын хоолой хаагдсан нь дэлхийн эдийн засагт шууд нөлөөлж, Brent маркийн газрын тосны үнэ 9%-иар өсөж, баррель нь 100 ам.долларт хүрлээ. Дэлхийн газрын тосны нийт хэрэглээний 20 орчим хувь нь дамждаг уг замыг хаасан нь эрчим хүчний аюулгүй байдалд ноцтой аюул учруулж байна. Үүний хариуд Олон улсын эрчим хүчний агентлагийн (IEA) гишүүн орнууд зах зээлийг тогтворжуулах зорилгоор стратегийн нөөцөөсөө түүхэнд байгаагүй их хэмжээний буюу 400 сая баррель тос гаргахаар тохиролцжээ.
Олон улсын хамтын нийгэмлэг Ираны шийдвэрт эрс шүүмжлэлтэй хандаж байна. Израилийн Ерөнхий сайд Беньямин Нетаньяху хэвлэлийн бага хурал хийж, Ираны шинэ удирдлагын амь насанд заналхийлсэн утгатай мэдэгдэл хийсэн бол АНУ-ын Ерөнхийлөгч Дональд Трамп Ираныг "бузар муугийн эзэнт гүрэн" гэж нэрлэв. Трамп газрын тосны үнээс илүүтэй Ираныг цөмийн зэвсэгтэй болохоос сэргийлэх нь хамгийн чухал зорилт болохыг онцолсон байна. Энэхүү хурцадмал байдал нь Ойрхи Дорнодын дайн улам өргөжих эрсдэлийг дагуулж байна.
Эх сурвалж:
• inews.mn
• sonin.mn
• dobu.mn
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.