Японы Ерөнхий сайд Санаэ Такайчи хайрын дуулианд холбогдсон сайдаа албан тушаалд нь үлдээжээ
Японы анхны эмэгтэй Ерөнхий сайд Санаэ Такайчи гэр бүлээс гадуурх харилцааны дуулианд холбогдсон Боловсрол, соёл, спорт, шинжлэх ухаан, технологийн сайд Ёохэй Мацүмотог албан тушаалд нь хэвээр үлдээхээр шийдвэрлэснээ албан ёсоор мэдэгдлээ. 2026 оны 3 дугаар сарын 12-ны өдөр болсон Төлөөлөгчдийн танхимын Төсвийн хорооны хуралдааны үеэр Ерөнхий сайд энэхүү шийдвэрээ танилцуулсан бөгөөд сайд Мацүмотог алдаагаа ажлаараа нөхөж, салбарынхаа үйл хэрэгт хичээнгүйлэн зүтгэхийг хүссэн байна.
Уг дуулианы талаарх мэдээллийг "Шүкан Бүншүн" сэтгүүл болон "Бүншүн Онлайн" цахим хуудас 3 дугаар сарын 11-ний өдөр анх олон нийтэд дэлгэсэн юм. Тус мэдээлэлд дурдсанаар, 52 настай сайд Ёохэй Мацүмото нь 2020 оноос хойш "А-ко" гэгдэх гэрлэсэн эмэгтэйтэй нууц амрагийн харилцаатай байсан гэгдэж байна. Тэд зөвхөн зочид буудалд бус, амралтын өдрүүдээр нарийн бичгийн дарга нарыг эзгүй үед Төлөөлөгчдийн танхимын гишүүдийн албаны байранд уулздаг байсан нь олон нийтийн зүгээс ёс зүйн томоохон шүүмжлэл дагуулаад байгаа юм.
Үүнээс гадна сайд Мацүмотогийн нууц амрагтайгаа ярилцаж байхдаа Ерөнхий сайд Санаэ Такайчигийн талаар "би түүнд үнэхээр дургүй" хэмээн хэлж буй аудио бичлэг задарсан нь асуудлыг улам хурцатгав. Гэсэн хэдий ч Ерөнхий сайд Такайчи түүнийг боловсролын салбарын мэргэжилтэн гэж үнэлж байгаа тул огцруулах шаардлагагүй гэж үзжээ. Хэрэв Мацүмото огцорсон бол энэ нь 2025 оны 10 дугаар сард байгуулагдсан Такайчигийн танхимын анхны томоохон халаа сэлгээ болох байлаа.
Сайд Ёохэй Мацүмото парламентын өмнө болон хэвлэл мэдээллийнхэнд хандан хүлцэл өчиж, болсон явдлыг "өнгөрсөн үеийн асуудал" хэмээн тайлбарласан байна. Тэрээр гэр бүлийн хүрээнд асуудлаа шийдэж, эхнэртээ зэмлүүлсэн тул ажлаа үргэлжлүүлэн хийх хүсэлтэй байгаагаа илэрхийлэв. Гэвч сөрөг хүчний "Төв үзэлт шинэчлэлийн холбоо" зэрэг намууд Ерөнхий сайдыг томилгооны хариуцлагаа хүлээж, Мацүмотог нэн даруй огцруулахыг шаардаж байна.
Энэхүү ёс зүйн дуулиан нь Засгийн газрын нэр хүндэд шууд нөлөөлж эхэлсэн бөгөөд Ерөнхий сайд Такайчигийн танхимын дэмжлэгийн түвшин нэг сарын дотор 63.8 хувиас 59 хувь болж буурчээ. Энэ нь түүнийг засаг барьж эхэлснээс хойших хамгийн бага үзүүлэлт болж байгаа бөгөөд цаашид сөрөг хүчний шахалт болон олон нийтийн эсэргүүцэл хэрхэн өрнөхөөс Засгийн газрын тогтвортой байдал хамаарахаар байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.