🔴Ардын нам парламентын засаглалыг хаах гэж байнa гэв

УИХ дахь Ардчилсан намын бүлгийн удирдлагууд болон намын нарийн бичгийн дарга нар цаг үеийн асуудлаар мэдээлэл хийлээ. Энэ үеэр МАН-ын засагласан сүүлийн 10 жилийн хугацаанд бий болсон авлигын тогтолцоог шүүмжилж, "100 МАН ЛАЙ " нэртэй авлигын эсрэг аяныг эхлүүлж байгаагаа мэдэгдэв.

Ардчилсан намын дарга О.Цогтгэрэл болон намын удирдлагуудын зүгээс МАН-ын засаглалын үед авлига системчлэгдсэн гэж үзэж байна. Тэд өнгөрсөн 10 жилийн хугацаанд гарсан авлигын хамгийн том 100 хэргийг иргэдийн оролцоотойгоор нэрлэж, олон нийтэд сануулах зорилгоор "An.mn" сайт болон сошиал сувгуудаар дамжуулан мэдээлэл цуглуулахаар болжээ. Энэхүү аян нь авлигачдыг зүгээр нэг хүнээр солих бус, тогтолцооны өөрчлөлт хийх шаардлагатайг харуулах зорилготой аж.

Мэдээллийн үеэр 2016 онд МАН засгийн эрх авмагцаа Төрийн болон албаны нууцын тухай хуульд өөрчлөлт оруулсныг онцлов. Уг өөрчлөлтөөр нууцын жагсаалтыг УИХ биш, Засгийн газар дур мэдэн баталдаг болсон нь төрийн өмчит компаниуд тендергүйгээр "оффтейк" болон хаалттай гэрээнүүд байгуулж, авлига цэцэглэх үндэс суурь болсон гэж шүүмжиллээ.

Мөн УИХ-ын гишүүн Н.Алтанхуягтай холбоотой шүүхийн шийдвэрийг улс төрийн зорилготой, шүүх засаглалын нэр хүндэд халдсан үйлдэл гэж үзэж байгаагаа илэрхийлэв. 2020 оны сонгуулийн үеэр нэр дэвшигчдийг баривчилж байсан түүх давтагдаж байгааг сануулж, парламентад энэ асуудлыг шалгах ажлын хэсэг байгуулах шаардлагатайг намын төлөөллүүд онцолсон юм.