🔴“Зэс эрдэнийн хувь” ХК: Сайд Э.Бат-Амгалан уулзаж, асуудлыг шийдэхгүй бол өлсгөлөнгөө зогсоохгүй

"Зэс эрдэнийн хувь" компанийн хувьцаа эзэмшигчид Хот байгуулалт, барилга, орон сууцжуулалтын яамны гадаа жагсаж, сайд Э.Бат-Амгалан болон түүний дүү Э.Батбаяр нарыг огцрохыг шаардан, өнөөдрөөс өлсгөлөн зарлажээ. 

“Зэс эрдэнийн хувь” ХК-ийн 24,552 хувьцаа эзэмшигчийн төлөөлөл болох иргэд үйлдвэрийн үйл ажиллагаа зогссон, ногдол ашиг олгогдоогүй болон хөрөнгө оруулагчтай холбоотой санхүүгийн маргааны улмаас Хот байгуулалт, барилга, орон сууцжуулалтын яамны гадна тэмцэл өрнүүлж байна. Тэмцлийн хүрээнд таван иргэн өлсгөлөн зарлаад 27 цаг болж байгаа бөгөөд тэдний биеийн байдал хүндэрч эхэлжээ. Жагсагчид сүүлийн гурав хоногийн турш салбарын сайдтай уулзахаар хүлээсэн боловч үр дүнд хүрээгүй байна.

Хувьцаа эзэмшигчдийн зүгээс гурван гол шаардлагыг тавьж байна. Нэгдүгээрт, хөрөнгө оруулагч нэрээр орж ирсэн Энхтайваны Батбаяр гэгч нь компанийг 30 орчим тэрбум төгрөгийн НӨАТ-ын өрөнд оруулж, цаана нь 70 орчим тэрбум төгрөгийн санхүүгийн зөрчил үүсгэсэн асуудлыг хуулийн хүрээнд шийдвэрлэхийг шаарджээ. Хоёрдугаарт, үйлдвэр зогссоны улмаас ажилгүй болоод байгаа 700 орчим ажилтан, туслан гүйцэтгэгч компаниудын эрх ашгийг хамгаалж, үйлдвэрийг яаралтай ажиллуулахыг хүсэж байна. Гуравдугаарт, тус компанийн үйл ажиллагааг улс төрийн зорилгоор харлуулж буй үйлдлээ зогсоохыг төр засгаас шаардлаа.

Тэмцэлд оролцогчид сайд Э.Бат-Амгалангийн Төрийн ордонд сэтгүүлчдэд өгсөн ярилцлагад ихээхэн бухимдалтай байна. Сайд уг жагсаалыг "улс төрийн захиалгатай, төлбөртэй" хэмээн тайлбарлаж, жагсагчдыг "нүүрсний хулгайч" гэж нэрлэснийг тэд эрс үгүйсгэв. Хувьцаа эзэмшигчид хэлэхдээ, "Бид 16 жилийн турш энэ үйлдвэрийн төлөө зүтгэсэн анхдагч хувьцаа эзэмшигчид. Бидний дунд ямар ч улс төрийн намын харьяалалтай хүн байхгүй, бүгд гэр хороололд амьдардаг жирийн иргэд. Бид хэн нэгнээс мөнгө авч жагсаагүй, харин өөрсдийнхөө хөрөнгө, ногдол ашгийг нэхэж байна" гэлээ.

Мөн жагсагчид сайд Э.Бат-Амгаланг өөрийн төрсөн дүү болох Э.Батбаярыг өмгөөлж, худал мэдээлэл тарааж байна гэж буруутгав. Тэдний хэлж буйгаар, Э.Батбаяр нь компанид нэг ч төгрөгийн бодит хөрөнгө оруулалт хийгээгүй бөгөөд бусад компаниудыг залилан мэхлэх замаар олсон хөрөнгөөрөө "хөрөнгө оруулагч" нэр зүүж, компанийн зэсийг өөрийн компаниар дамжуулан борлуулж ашиг олж байсан гэв. Үүний улмаас компани их хэмжээний өрөнд орж, жирийн хувьцаа эзэмшигчид 16 жилийн турш нэг ч төгрөгийн ногдол ашиг авч чадаагүй байна.

Одоогийн байдлаар өлсгөлөн зарлаж буй иргэдийн тоо нэмэгдэх хандлагатай байгаа бөгөөд Эрдэнэт хотоос 100 гаруй хувьцаа эзэмшигч ирж нэгдэхээр замдаа гарчээ. Түр хорооны зүгээс Монгол Улсын Ерөнхийлөгч болон Ерөнхий сайдад албан ёсны шаардлага хүргүүлсэн бөгөөд асуудлыг шийдвэрлэх хүртэл тэмцлийн хурц хэлбэрт шилжиж, хуурай өлсгөлөн зарлахад бэлэн байгаагаа мэдэгдлээ.

“Зэс эрдэнэ” ХК-ийн хувьцаа эзэмшигчдийн дунд өнөөдрийн байдлаар 2000 гаруй хүн ногдол ашгаа үзэж чадалгүй хорвоогийн мөнх бусыг үзүүлсэн байна. Тэмцэгчид "Бидний үр хүүхэд, ач зээ нарын өмч болох энэ баялгийг хэн нэгэн эрх мэдэлтэн, түүний гэр бүл завшиж байгааг зүгээр хараад суухгүй" хэмээн байр сууриа илэрхийллээ. Энэхүү нөхцөл байдал цаашид хэрхэн өрнөх нь сайд Э.Бат-Амгалан болон Засгийн газрын гаргах шийдвэрээс шууд хамаарахаар байна.