🔴М.Бадамсүрэн: Иргэд тэтгэврийн хэмжээг дахин нэмэгдүүлэх санал тавьж байна

Хүнс, хөдөө аж ахуй, хөнгөн үйлдвэрийн сайд М.Бадамсүрэнгээс тодрууллаа. 

Хүнс, хөдөө аж ахуй, хөнгөн үйлдвэрийн сайд М.Бадамсүрэн: 

-Дорнод аймгийн зүүн хойд болон зүүн урд захын сумд болох Чулуунхороот (Эрээнцав), Дашбалбар, Гурванзагал, Халхгол сумдад хаваржилт нэн хүнд байгаа. Хүчтэй цасан шуурганы улмаас хүний амь эрсэдсэн харамсалтай хэрэг гарсан бөгөөд одоогоор Улсын болон орон нутгийн онцгой комисс, цэргийн байгууллагууд хамтран зам гаргах, малчдын гэр, хашааг цаснаас чөлөөлөх, өвс тэжээл хүргэх ажлыг шуурхай зохион байгуулж байна.

Цаашид малчдыг битүү хашаа саравчтай болгох, цөөн тооны өндөр ашиг шимт малтай болохыг дэмжих, хөдөө орон нутгийн холбоо, интернэтийн сүлжээг сайжруулах зэрэг арга хэмжээнүүдийг төлөвлөж байна. Энэ хүрээнд салбарын яамнаас малчдад бизнесийн зөвлөх үйлчилгээ үзүүлэх, сургалт явуулах төслийг 21 аймгийн 70 суманд хэрэгжүүлэхээр бэлтгэл ажлыг хангаж байгаа.

Иргэдтэй уулзах үеэр ахмадууд тэтгэврийн нэмэгдлийг амьжиргаанд хүрэлцэхгүй байгааг хэлж, дахин нэмэгдүүлэх хүсэлт тавьжээ. Харин малчдын хувьд төрөөс халамж хүсэхээс илүүтэй малын түүхий эд, мах, ноолуурын үнийг тогтворжуулах, экспортыг дэмжих бодлого хэрэгтэй байгааг илэрхийлсэн байна. Мөн сургууль, цэцэрлэгийн хүртээмж, засвар үйлчилгээ болон автомашины хангамжийн асуудлууд тулгамдсан хэвээр байгааг иргэд уламжилжээ.

Түүнчлэн УИХ-ын гишүүн Ерөнхийлөгчийн санаачилсан хариуцлагын тухай хуулийн төслийг бүрэн дэмжиж байгаагаа илэрхийлэв. Тэрээр төрийн түшээд ёс зүйтэй, хариуцлагатай байж, тангарагтаа үнэнч ажиллах ёстойг онцлоод, үүргээ биелүүлээгүй гишүүнийг эргүүлэн татдаг байх нь зүйтэй гэсэн байр суурьтай байна.