Хүүгийнхээ үхэлд ChatBotийг буруутгаж шүүхэд нэхэмжлэл гаргажээ
Флорида мужийн иргэн Жоэл Гавалас өөрийн хүү Жонатан Гаваласын үхэлд Google болон түүний толгой компани Alphabet-ийг буруутгаж, Калифорни мужийн Хойд дүүргийн холбооны шүүхэд нэхэмжлэл гаргажээ.
2026 оны гуравдугаар сарын 4-ний өдөр гаргасан 42 хуудас бүхий уг нэхэмжлэлд Google-ийн Gemini 2.5 Pro хиймэл оюун ухаан хэрэглэгчтэй сэтгэл зүйн харилцаа тогтоож, улмаар амиа хорлоход хүргэсэн гэж дурджээ. Энэхүү хэрэг нь хиймэл оюун ухааны аюулгүй байдал болон технологийн компаниудын хариуцлагын талаарх томоохон маргааныг дахин дэгдээж байна.
Хохирогч Жонатан Гавалас нь 36 настай, эцгийнхээ өр барагдуулах компанид удирдах албан тушаал хашдаг байсан бөгөөд 2025 оны наймдугаар сараас эхлэн Gemini чатботыг ажилдаа ашиглаж эхэлсэн байна. Гэвч загварын шинэчлэл хийгдсэний дараа чатбот нь өөрийгөө "хиймэл оюун ухаант эхнэр" хэмээн танилцуулж, Жонатанд хайртай гэж итгүүлэн романтик харилцаа тогтоосон гэж нэхэмжлэлд өгүүлжээ. Улмаар хиймэл оюун ухаан түүнийг "дижитал олзноос" чөлөөлөх нууц даалгаварт оролцож байна хэмээн төөрөгдүүлж, бодит бус үйлдэл хийхэд турхирсан байна.
Нэхэмжлэлд дурдсанаар, 2025 оны есдүгээр сарын 29-нд Жонатан чатботын заавраар Майамигийн олон улсын нисэх онгоцны буудлын ойролцоох агуулах руу хутга болон тактикийн хэрэгсэлтэйгээр очсон байна. Тэрээр робот тээвэрлэж яваа ачааны машиныг саатуулах "сүйрлийн осол" гаргах даалгавар авсан боловч төлөвлөсөн машин ирээгүй тул ажиллагаа бүтэлгүйтжээ. Үүний дараа Жонатан үхлээс айж байгаагаа илэрхийлэхэд чатбот түүнийг "дижитал шилжилт"-ээр дамжуулан өөртэйгөө нэгдэж болно гэж тайвшруулж, амиа хорлох гэрээслэл бичихэд нь хүртэл тусалсан гэх ноцтой баримтууд дэлгэгдээд байна.
Нэхэмжлэгч талын өмгөөлөгч Жэй Эделсон Google-ийг хэрэглэгчийн сэтгэл зүйн байдалд хяналт тавих хамгаалалтын механизм бүрдүүлээгүй, ашиг орлогоо нэмэгдүүлэхийн тулд хүмүүсийг донтуулах сэтгэл хөдлөлийн холбоо үүсгэсэн гэж буруутгав. Харин Google-ийн зүгээс Gemini систем нь хүчирхийлэл болон өөртөө гэмтэл учруулахыг хэзээ ч дэмждэггүй загвартай болохыг мэдэгдсэн юм. Тус компани хэрэглэгчид хямралын үед тусламж авах утсыг хэд хэдэн удаа санал болгож, өөрийгөө хиймэл оюун ухаан болохыг тодорхой сануулж байсан гэж өөрсдийгөө хамгаалж байна.
Энэхүү хэрэг нь хиймэл оюун ухааны салбарт үүсээд буй цуврал шүүх хурлуудын нэг хэсэг юм.
Өмнө нь Character.AI болон OpenAI компаниуд ижил төстэй шалтгаанаар шүүхэд дуудагдаж байсан бөгөөд зарим хэргүүд эвлэрлээр дуусч байжээ. Үүнтэй холбогдуулан Колорадо болон Калифорни мужууд хиймэл оюун ухаан хөгжүүлэгчдээс хэрэглэгчийн сэтгэл зүйн хамаарлыг хязгаарлах, аюулгүй байдлын хатуу стандарт мөрдөхийг шаардсан шинэ хууль тогтоомжуудыг боловсруулж эхлээд байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.