63 мууртай хамт амьдарч буй Б.Мөнхчимэг

Б.Мөнхчимэг гэх бүсгүй сүүлийн 10 жилийн турш гудамжинд хаягдсан, бэртэж гэмтсэн амьтдыг аварч хамгаалсаар иржээ. Өдгөө тэрээр өөрийн байгуулсан асрамжийн газартаа нийт 63 муур, 21 нохойн хамт амьдарч байна. Санхүүгийн боломжоос шалтгаалан амьтдадаа зориулсан тусдаа байр барьж амжаагүй тул тэрээр Монгол гэртээ эдгээр дөрвөн хөлтэй найзуудтайгаа хамт хоноглодог байна. Гал түлэхээс эхлээд аюулгүй байдлыг нь хангахын тулд тэрээр амьтдаа ганц ч хором орхиж зүрхэлдэггүй ажээ.

Түүний асрамжийн газарт ирсэн амьтан бүр өөрийн гэсэн өрөвдөм түүхтэй. Машинд дайруулж бэртсэн, хараагүй болсон, бөгсөн бие нь мэдээгүй болж чирэгдсэн, тэр байтугай эзэндээ хаягдсан гээд хүнд хэцүү тавилан туулсан амьтад энд ирж амар амгаланг олдог. Хөгжлийн бэрхшээлтэй болон хөгшин амьтдыг хүмүүс тэр бүр үрчилж авдаггүй тул тэд Б.Мөнхчимэгийн асрамжийн газарт үүрд үлддэг байна. Тухайлбал, 12 жил хамт байсан Бужи муур нь одоо шүдгүй болтлоо хөгширсөн ч түүний хайр халамжинд энх тунх амьдарсаар байна.

Б.Мөнхчимэг мэргэжлийн агрономич бөгөөд амьтдынхаа хоол хүнс, байрны түрээсийн мөнгийг олохын тулд зундаа айлын хашаанд ногоо тарьж, өвөлдөө хэд хэдэн ажил зэрэг хийдэг байна. Тэрээр багаасаа амьтанд хайртай ээж, аавынхаа хүмүүжлээр өссөн бөгөөд "Амьтан хайрладаг хүүхэд, хүнийг ч бас хайрлаж, хүндэлж сурдаг" хэмээн ярьж байлаа. Түүний ээж нь анх "Миний охин энэ амьтныг насан туршид нь хайрлаж чадах уу? Энэ бол маш том хариуцлага шүү" гэж хэлснээр тэрээр энэ замыг эргэлт буцалтгүй сонгожээ.

Олон нийтийн дунд муурыг "муу ёрын амьтан" гэх өрөөсгөл ойлголт байдагт тэрээр харамсаж явдгаа илэрхийлэв. Харин ч амьтан тэжээх нь гэр бүлд аз жаргал, хайр халамжийг авчирдаг бөгөөд муур айл гэрт эерэг энерги түгээдэг гэдгийг тэрээр онцолсон юм. Мөн хүмүүс амьтан үрчилж авахдаа зөвхөн зулзага байх үеийн өхөөрдөм төрхөнд нь хууртахгүй, насан туршийн хариуцлага гэдгийг ухамсарлах хэрэгтэйг санууллаа.

Цаашид Б.Мөнхчимэг асрамжийн газраа улам өргөжүүлж, Монголд олон улсын стандартад нийцсэн амьтны асрамжийн газар байгуулах том мөрөөдөлтэй. Тэрээр амьтан тэжээж буй иргэдэд хандан, гудамжинд хаягдах амьтдын тоог цөөлөхийн тулд үржил хаах хагалгааг заавал хийлгэхийг уриалж байна. Нэг муурын үржлийг хааснаар жилд 15, арван жилд 150 гаруй зулзага гудамжинд гарч зовохоос сэргийлж чадах юм.