🔴 “Зэс эрдэнийн хувь” ХК-ийн хохирогчид: Бидний шаардлагыг биелүүлэхгүй бол өлсгөлөн зарлана

“Зэс эрдэнийн хувь” ХК-ийн хувьцаа эзэмшигчид болон ажилчдын төлөөлөл өнөөдөр Хот байгуулалт, барилга, орон сууцжуулалтын сайд Э.Бат-Амгаланг огцрохыг шаардаж, яамных нь гадна жагсаал зохион байгууллаа. Жагсагчид тус компанийн хөрөнгө оруулалт хариуцсан захирлаар ажиллаж байсан, сайд Э.Бат-Амгалангийн төрсөн дүү Э.Батбаярыг их хэмжээний мөнгө шамшигдуулсан хэрэгт буруутгаж байгаа юм.

“Зэс эрдэнийн хувь” ХК-ийн хувьцаа эзэмшигчдийн түр хорооны дарга н.Дөлгөөнтамирын мэдээлснээр, Э.Батбаяр нь тус компаниас 30 орчим тэрбум төгрөгийг НӨАТ-ын зөрүү болон бусад зардлаар халхавчлан шамшигдуулсан бөгөөд нийт хохирлын хэмжээ 70 орчим тэрбум төгрөгт хүрээд байгаа гэлээ. Энэхүү асуудлаар Авлигатай тэмцэх газарт (АТГ) хандсан боловч өнөөдрийг хүртэл тодорхой хариу ирээгүй байгаа нь улс төрийн нөлөө орсон гэж үзэхэд хүргэж байгааг тэрээр онцоллоо.

Тус компанийн ТУЗ-ийн гишүүн н.Энхтуяа хэлэхдээ, “Э.Батбаяр нь өөрийн хамаарал бүхий компаниар дамжуулан борлуулалтын орлогыг замаас нь авч, компанийг санхүүгийн хүндрэлд оруулсан. Үүний улмаас Орхон аймгийн 24,500 гаруй хувьцаа эзэмшигч сүүлийн хоёр жил ногдол ашиг авч чадаагүй байна. Түүнчлэн үйлдвэрийн үйл ажиллагааг зориуд гацааж, инженер техникийн ажилчдыг хууль хяналтын байгууллагаар дарамтлуулах ажиллагааг сайд ахынхаа нөлөөгөөр гүйцэтгэж байна” гэлээ.

Жагсаалд оролцож буй ажилчдын төлөөлөл үйлдвэр хэвийн ажиллах боломжгүй болсноос цалин хөлсөө цагт нь авч чадахгүй, банкны өр зээлэнд орж байгаагаа гомдоллов. Тэд Э.Батбаярыг хууль хяналтын байгууллагаар шударгаар шалгуулах боломжийг олгох, мөн ёс зүйн хариуцлага хүлээж Э.Бат-Амгалан сайдыг албан тушаалаасаа огцрохыг шаардлаа.

Хувьцаа эзэмшигчид өөрсдийн шаардлагыг Монгол Улсын Ерөнхийлөгч, Ерөнхий сайд болон УИХ-ын даргад албан ёсоор хүргүүлж байгаа бөгөөд хэрэв асуудлыг шуурхай шийдвэрлэхгүй бол тэмцлийн хурц хэлбэрт шилжиж, өлсгөлөн зарлахаа мэдэгдлээ

“Зэс эрдэнийн хувь” ХК нь 2010 онд байгуулагдсан бөгөөд Орхон аймгийн олон мянган иргэдийн оролцоотой, үндэсний бүтээн байгуулалтын томоохон төслүүдийн нэг юм. Гэвч дотоод зөрчил болон санхүүгийн луйврын шинжтэй үйлдлүүдээс шалтгаалан үйлдвэрийн үйл ажиллагаа зогсох аюулд ороод байгааг иргэд анхааруулж байна.