Шинж тэмдэггүй зүрхний шигдээс амь насанд аюул учруулж байна
2026 оны гуравдугаар сарын байдлаар дэлхий даяар сая сая хүмүүс өөрсдийгөө зүрхний шигдээстэй болсон гэдгээ мэдэлгүй өнгөрөөж байгаа нь анагаах ухааны салбарын тулгамдсан асуудал болоод байна.
"Чимээгүй инфаркт" буюу шинж тэмдэггүй зүрхний шигдээс нь цээжээр хүчтэй өвдөх зэрэг сонгодог шинж тэмдэггүйгээр зүрхний булчинг гэмтээж, ирээдүйд амь насанд хүрэх эрсдэлийг хэд дахин нэмэгдүүлж байгааг мэргэжилтнүүд анхаарууллаа.
Энэхүү эмгэг нь зүрхний булчингийн цусан хангамж тасалдаж, сорви тогтох хэмжээний гэмтэл учруулдаг ч өвчтөнд ямар нэгэн хүчтэй зовуурь мэдрэгддэггүйгээрээ онцлог юм. Хүмүүс ихэвчлэн энэ үеийн шинж тэмдгийг ердийн ядаргаа, ходоодны хямрал, эсвэл бага зэргийн таагүй мэдрэмжтэй андуурч өнгөрөөдөг байна. Гэвч өвдөлт мэдрэгдээгүй ч зүрхэнд үүссэн сорви нь дараагийн удаа илүү аюултай, үхэлд хүргэх дахин шигдээс болох эрсдэлийг 35 хувиар нэмэгдүүлдэг болохыг судалгаагаар тогтоожээ.
Саяхан "Journal of Medical Case Reports" сэтгүүлд нийтлэгдсэн Норвегийн 35 настай иргэний тохиолдол олон нийтийн анхаарлыг татаад байна. Ямар нэгэн хорт зуршилгүй, удамшлын өвчингүй байсан залуу гудамжинд гэнэт нас барсан бөгөөд задлан шинжилгээгээр түүнийг нас барахаасаа хэдэн долоо хоногийн өмнө "чимээгүй инфаркт" болсныг тогтоожээ.
Тэрээр тухайн үед цээжээр ердөө хоёр цаг орчим эвгүйрхэхийг ердийн таагүй мэдрэмж хэмээн тоолгүй өнгөрөөсөн байна. Кардиологич Роберт Боноугийн хэлснээр нийт инфарктын 20-50 хувь нь ийм байдлаар шинж тэмдэггүй явагддаг бөгөөд МРТ шинжилгээнд хамрагдсан хүмүүсийн 78 хувь нь өөрсдийгөө зүрхний шигдээс болсноо мэдээгүй байжээ.
Зүрхний эмч нарын зөвлөж буйгаар цээжний төв хэсэгт даралт мэдрэгдэх, эрүү, хүзүү, нуруу эсвэл гар руу дамжиж өвдөх зэрэг шинж тэмдгийг анхаарах хэрэгтэй. Мөн хоол боловсруулах замын хямралтай холбоогүй дотор эвгүйрхэх, цээж хорсох, ердийн ачааллын үед амьсгаадах, шалтгаангүйгээр хүйтэн хөлс цухуйх нь зүрхний асуудал үүссэний дохио байж болно. Ялангуяа чихрийн шижинтэй хүмүүс мэдрэлийн төгсгөлүүд нь гэмтсэн байдаг тул өвдөлтийг мэдрэхгүй байх магадлал өндөр байдаг бол эмэгтэйчүүд болон өндөр настнуудад шинж тэмдэг нь бүдэг илэрдэг байна.
Цусны даралт 140/90-ээс дээш байх нь "чимээгүй инфаркт" болох гол хүчин зүйл болж байгааг мэргэжилтнүүд онцолж байна. Иймд цээж орчимд бага зэргийн таагүй мэдрэмж төрөх, эсвэл тайлбарлах боломжгүй амьсгаадалт илэрсэн тохиолдолд зүрхний ЭХО эсвэл МРТ шинжилгээнд яаралтай хамрагдахыг зөвлөж байна.
Энэхүү далд аюулаас урьдчилан сэргийлэх цорын ганц арга бол цусны даралтаа тогтмол хянаж, бие махбодод гарч буй өөрчлөлт бүрийг анхааралтай ажиглах явдал юм.
Эх сурвалж:
• ivbg.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.