🔴АН: Н.Алтанхуяг ерөнхийлөгчийн сонгуульд өрсөлдөнө гэж мэдэгдсэний дараа улс төрийн захиалга, залхаан цээрлүүлэлт явагдаж байна

Ардчилсан намаас долоо хоног бүр зохион байгуулдаг "4:11" мэдээллийн цагаар цаг үеийн тулгамдсан асуудлууд болон намын дотоод шинэчлэлийн талаар мэдээлэл хийлээ. Энэ удаагийн хурлаар Ерөнхий сайд асан Н.Алтанхуягт холбогдох шүүх үйл явц, сайжруулсан түлшний хохирогчдод олгох нөхөн төлбөрийн шийдвэр болон эмэгтэйчүүдийн эдийн засгийн оролцооны талаар онцлов.

УИХ-ын гишүүн О.Алтангэрэл: 

-Монгол Улсын 27 дахь Ерөнхий сайд Н.Алтанхуягтай холбоотой ээлжит нэгэн шүүх хурал явагдаж байна. Тус хэрэг 2017 оноос хойш есөн жилийн турш шалгагдаж байгаа бөгөөд 2022 онд яллагдагчаар татсанаас хойш дөрвөн жил гаруй хугацаа өнгөрчээ. Энэ хугацаанд шүүхээс түүнийг гурван удаа цагаатгасан боловч прокурорын байгууллагаас эсэргүүцэл бичиж, дөрөв дэх удаагаа шүүхээр хэлэлцэх гэж байна. Ардчилсан намын зүгээс үүнийг ирэх Ерөнхийлөгчийн сонгуульд өндөр рейтингтэй байгаа нэр дэвшигчийг замаас нь зайлуулах гэсэн эрх баригчдын улс төрийн захиалга, залхаан цээрлүүлэлт гэж үзэж байна гэлээ. 

Мөн сайжруулсан шахмал түлшний угаарын хийд хордсон иргэдийн хохирлыг барагдуулах шүүхийн шийдвэр гарсан талаар хуульчид мэдээллээ.

-2019 онд шахмал түлшинд хордож хүүхэд нь нас барсан, эх нь хөдөлмөрийн чадвараа 70 хувь алдсан гэр бүл шүүхэд хандсанаар, Сүхбаатар дүүргийн иргэний хэргийн шүүхээс "Тавантолгой түлш" ХХК-ийг 625 сая төгрөгийн нөхөн төлбөр олгох шийдвэр гаргажээ. Шүүхээс үйлдвэрлэгч талыг Хэрэглэгчийн эрхийг хамгаалах тухай хууль болон Стандартын тухай хуульд заасан аюулгүй ажиллагааны зааварчилгааг бүрэн өгөөгүй гэж дүгнэсэн байна гэв. 

Олон улсын эмэгтэйчүүдийн эрхийг хамгаалах өдрийг угтан эмэгтэйчүүдийн эдийн засгийн оролцооны талаарх статистик баримтуудыг танилцууллаа.

Олон улсын хөдөлмөрийн байгууллагын судалгаагаар 2016 оноос хойш эмэгтэйчүүдийн хөдөлмөр эрхлэлтийн оролцоо нэмэгдээгүй бөгөөд 53 хувьтай хэвээр байна. Түүнчлэн эмэгтэйчүүдийн дундаж цалин эрэгтэйчүүдийнхээс 22 хувиар бага байгаа нь эдийн засгийн эрх тэгш бус байдал газар авсныг илтгэж байна. Иймд хүүхэд харах үйлчилгээг хүртээмжтэй болгох, охидыг инженер, технологийн чиглэлээр сургах замаар өндөр цалинтай ажлын байранд зуучлах бодлого хэрэгжүүлэхийг уриаллаа.

Намын дотоод зохион байгуулалтын хүрээнд "Ардчилсан, нээлттэй, цэгцтэй АН" аян орон даяар үргэлжилж байгааг дуулгав. Гишүүдийн шинэчилсэн бүртгэлд идэвхтэй оролцсон гишүүдээс таван хүнийг ардчилсан тогтолцоотой улс орнуудад аялуулах хөтөлбөр зарласан байна. Мөн бүртгэлд хамгийн өндөр хувьтай хамрагдсан сум, хороодыг шалгаруулж, намын Их хурлын үеэр урамшуулахаар болжээ.