Ким Жон Ун Өмнөд Солонгосыг "мөнхийн дайсан" хэмээн албан ёсоор зарлалаа
Пхеньян хотноо долоо хоногийн турш үргэлжилсэн Хөдөлмөрийн намын IX их хурлын үеэр БНАСАУ-ын удирдагч Ким Жон Ун түүхэн мэдэгдэл хийж, ирэх таван жилийн бодлогоо тодорхойллоо.
Энэхүү хурлын хамгийн гол үр дүн нь тэрбээр Өмнөд Солонгосыг "засаршгүй дайсагнагч улс" болон "мөнхийн дайсан" гэж тодорхойлсон явдал байв. Удирдагч Ким Жон Ун хоёр Солонгос нэг үндэстэн гэх уламжлалт үзэл баримтлалаас бүрмөсөн татгалзаж буйгаа зарласан нь Солонгосын хойгийн геополитикийн нөхцөл байдлыг улам хурцатгаж байна.
Их хурлын шийдвэрийн дагуу Пхеньян хөрш улсаа цэргийн хүчээр дарах бэлтгэлээ эрчимжүүлэхээр болжээ. Ким Жон Ун хэрэв тус улсын аюулгүй байдалд өчүүхэн төдий заналхийлэл учирвал Өмнөд Солонгосыг "бүрмөсөн устгах" цэргийн бүрэн чадамжтай гэдгээ хатуу анхааруулсан юм. Энэхүү мэдэгдэл нь Сөүлтэй харилцах харилцаанд эрс өөрчлөлт гарч, энхийн яриа хэлэлцээ, эвлэрлийн орон зай хумигдаж буйг илтгэж байгаа бөгөөд цаашид хоёр улсын хооронд зэвсэгт мөргөлдөөн гарах эрсдэлийг нэмэгдүүлж байна.
Хурлын хаалтын ажиллагааны үеэр Ким Ир Сений талбайд зохион байгуулагдсан цэргийн томоохон парадад Ким Жон Ун өөрийн охин Ким Жу Э-гийн хамт оролцсон нь залгамжлагчийн асуудлыг дахин олны анхаарлын төвд авчирлаа. Парадын үеэр ирэх таван жилд хэрэгжүүлэх зэвсэглэлийн шинэчилсэн хөтөлбөрийг танилцуулсан байна. Үүнд усан доороос харвах тив алгасах баллистик пуужин, тактикийн цөмийн зэвсгийн тоог нэмэгдүүлэх, хиймэл оюун ухаанд суурилсан довтолгооны дрон болон сансрын биетүүдийг устгах зэвсэг бүтээх зэрэг амбицтай зорилтууд багтжээ.
Гадаад бодлогын хувьд Пхеньян АНУ-тай хийх яриа хэлэлцээний хаалгыг бүрмөсөн хаагаагүй байна. Хэрэв Вашингтон дайсагнасан бодлогоосоо татгалзаж, Хойд Солонгосыг цөмийн зэвсэгтэй улс гэж албан ёсоор хүлээн зөвшөөрвөл дипломат харилцаа сэргэх боломжтойг удирдагч онцолжээ. Гэсэн хэдий ч ОХУ-тай цэргийн хамтын ажиллагаагаа гүнзгийрүүлж, Москвагаас сансрын болон пуужингийн өндөр технологи авч байж болзошгүй гэх олон улсын хардлага хэвээр байгаа нь барууны орнуудын санааг зовоосон асуудал хэвээр байна.
Бүс нутгийн аюулгүй байдлын шинжээчид ирэх гуравдугаар сард болох АНУ болон Өмнөд Солонгосын "Freedom Shield" хамтарсан сургуулилалтын үеэр нөхцөл байдал улам хурцдана гэж таамаглаж байна. Пхеньяны зүгээс шинээр баталсан цэргийн доктриныхоо хүрээнд пуужингийн туршилт хийж, хариу арга хэмжээ авах магадлал өндөр байгаа нь Зүүн хойд Азийн аюулгүй байдалд томоохон сорилт болж байна.
Эх сурвалж:
• gogo.mn
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.