Нярайд цөцгийн тос ихээр өгөх "шинэ тренд" эрүүл мэндэд эрсдэлтэйг анхаарууллаа
Нярай хүүхдэд унтахын өмнө их хэмжээний цөцгийн тос өгөх "butter before bed" хэмээх шинэ трэнд давлагаа эрчээ авч эхэллээ.
TikTok болон Instagram платформ дээр эцэг эхчүүд хүүхдээ тайван унтуулах, тархины хөгжлийг дэмжих зорилгоор бүхэл цөцгийн тос идүүлж буй бичлэгүүд олон сая хандалт аваад байна. Гэвч хүүхдийн эмч, хоол тэжээлийн мэргэжилтнүүд энэхүү арга нь шинжлэх ухааны үндэслэлтэй мэт боловч бодит байдал дээр нярайн эрүүл мэндэд ноцтой эрсдэл учруулж болзошгүйг хатуу анхааруулж байна.
Энэхүү хандлагыг дэмжигчид болон цахим орчны нөлөөлөгчид цөцгийн тос нь өөх тосны өндөр агууламжтай тул хүүхдийн тархинд "цэвэр түлш" болдог хэмээн сурталчилж байна. Тэдний үзэж байгаагаар, өөх тос нь хүүхдийг удаан хугацаанд цатгалан байлгаж, шөнийн турш 10-12 цаг тасралтгүй унтахад тусалдаг аж. Ялангуяа "Kerrygold" зэрэг өвсөөр тэжээгдсэн үнээний сүүний цөцгийн тосыг халбагадаж өгөх, эсвэл бүхлээр нь мэрүүлэх үзэгдэл түгээмэл ажиглагдах болжээ. Гэвч Австралийн нярайн нойр судлалын төв зэрэг мэргэжлийн байгууллагууд шөнө их хэмжээний өөх тос өгөх нь нойрны чанарыг сайжруулдаг гэсэн шинжлэх ухааны нотолгоо байхгүйг мэдэгдсэн байна.
Анагаах ухааны мэргэжилтнүүд нярай хүүхдэд өөх тос нэн шаардлагатай гэдэгтэй санал нэгдэж байна. Хоёр хүртэлх насны хүүхдийн тархины хөгжил маш хурдацтай явагддаг бөгөөд тархины бүтцийн ихэнх хэсэг нь фосфолипидээс тогтдог тул өдөр тутмын илчлэгийнхээ 50 орчим хувийг өөх тосноос авах шаардлагатай байдаг. Мөн цөцгийн тос нь А, D, E, K зэрэг тосонд уусдаг амин дэмүүд болон гэдэсний эрүүл мэндийг дэмжих бутират зэрэг чухал шим тэжээлийг агуулдаг нь үнэн юм. Тиймээс насанд хүрэгчид шиг өөх тос багатай хоолны дэглэм нярайд тохиромжгүй байдаг.
Гэсэн хэдий ч мэргэжилтнүүд өөх тосыг хүүхдэд өгөх "арга хэлбэр" нь буруу байгааг онцолж байна. Хоол тэжээлийн мэргэжилтэн Шарлотт Стирлинг-Рид зэрэг шинжээчид цөцгийн тосыг бүхлээр нь, эсвэл том хэрчмээр өгөх нь залгих чадвар бүрэн хөгжөөгүй нярайд амьсгал боогдох өндөр эрсдэл дагуулдаг болохыг санууллаа. Түүнчлэн, хүүхдийн ходоодонд хязгаарлагдмал зай байдаг тул хэт их тос өгөх нь өсөлтөд нэн шаардлагатай төмөр, цайр, уураг зэрэг бусад шим тэжээлийг "шахан гаргах" аюултай. Мөн худалдаанд буй олон төрлийн цөцгийн тос давсны агууламж өндөртэй байдаг нь нярайн бөөрөнд ачаалал өгдөг байна.
Америкийн Хүүхдийн Эмч нарын Академи (AAP) болон бусад эрүүл мэндийн байгууллагуудын зүгээс эцэг, эхчүүдэд хандан цөцгийн тосыг дангаар нь бус, харин брокколи, амтат төмс эсвэл бүхэл үрийн талх зэрэг шим тэжээлтэй хоолонд бага хэмжээгээр хольж өгөхийг зөвлөж байна. Шөнө хүүхэд сэрэх нь зөвхөн өлсөхөөс бус хөгжлийн болон зан үйлийн олон шалтгаантай байдаг тул "нойрны хак" болгон ашиглах нь шинжлэх ухааны үндэслэлгүй юм. Энэхүү тренд нь зөв шинжлэх ухааныг буруу, аюултай аргаар хэрэглэж буйн тод жишээ болж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.