🔴Сар шинийн баярыг тохиолдуулан төрийн дээд цол, одон, медаль хүртсэн эрхмүүдийн сэтгэгдлийг хүргэж байна

Сар шинийн баярыг тохиолдуулан Монгол Улсын Ерөнхийлөгчийн зарлигаар салбар бүртээ олон жил үр бүтээлтэй ажилласан эрхмүүд төрийн дээд шагнал, цол хэргэм хүртлээ. Шагнал гардан авсан эрхмүүд өөрсдийн ажил үйлс болон сэтгэгдлээ ийнхүү хуваалцаж байна.

Дундговь аймгийн Хулд сумын ахмад настан, мал зүйч мэргэжилтэй эрхэм Гавьяат цол хүртлээ. Тэрээр Хулд сумын "Хүрэн бор" омгийн тэмээг өсгөн үржүүлэх, түүний хэмжээ зүйг судалж шинжлэх үйлсэд олон жилийн хөдөлмөрөө зориулсан нэгэн юм. Тэрээр хэлэхдээ, "Энэхүү хүндтэй шагналыг авахад гэр бүл, үр хүүхдүүдийн маань халамж, дэмжлэг их байлаа. Нутгийн зон олон, тэмээчиддээ сар шинийн мэнд хүргэж, есөн үеэрээ жаргалтай явахын өлзийтэй ерөөлийг дэвшүүлье" хэмээв.

Мөн хүнсний үйлдвэрлэлийн салбарт 23 жил, үүнээс "Сүү" ХК-ийн гүйцэтгэх захирлаар найм дахь жилдээ ажиллаж буй эрхэм төрийн дээд шагналаар шагнагдлаа. Тэрээр сүүлийн жилүүдэд үндэсний үйлдвэрлэлийг олон улсын стандартад хүргэх, хүчин чадлыг нэмэгдүүлэх чиглэлээр идэвхтэй ажиллаж байгаа юм. Тухайлбал, "Сүү" ХК энэ жил үйлдвэрлэлийн хүчин чадлаа хоёр дахин нэмэгдүүлж, хоногт 400 тонн сүү боловсруулах боломжтой болсон бөгөөд дэлхийн шилдэг технологийг үйлдвэрлэлдээ нэвтрүүлээд байна.

Соёл урлагийн салбараас уртын дуучин, бөхийн засуул, "Алтан гадас" одонт эрхэм сэтгэгдлээ хуваалцав. Тэрээр Монгол Улсын манлай засуул Б.Батболд болон Гавьяат багш Ц.Дэлгэр нарын шавь бөгөөд өдгөө 3000 орчим шавь бэлтгэж, үндэсний өв соёлыг түгээн дэлгэрүүлж байна. Олон улсын уртын дууны уралдаанд хоёр удаа магнайлж байсан тэрээр морь, бөхийн цол дуудах өв соёлыг залуу үедээ өвлүүлэн үлдээх үйлсэд хүчин зүтгэж буйгаа онцоллоо.

Боловсролын салбарт 30 гаруй жил зүтгэж, олон зуун сэтгүүлч, зохиолчдыг бэлтгэсэн ахмад багш мөн төрийн шагнал хүртлээ. Тэрээр "Үнэн" сонин, МОНЦАМЭ агентлаг, ТВ9 телевиз зэрэг хэвлэл мэдээллийн байгууллагуудад ажиллахаас гадна Улаанбаатар Эрдэм их сургууль, Отгонтэнгэр их сургууль, Утга зохиолын дээд сургуулиудад багшилж ирсэн туршлагатай. Тэрээр хамт олон болон шавь нартаа сар шинийн мэндчилгээ дэвшүүлсэн юм.

Геологийн салбарт 56 жил тасралтгүй ажиллаж буй гидрогеологич "Аж үйлдвэрийн гавьяат ажилтан" цолоор шагнагдлаа. Тэрээр эх орныхоо томоохон үйлдвэрүүд болон аймгуудын усан хангамжийн судалгааг гардан гүйцэтгэж иржээ. Ялангуяа Дундговь аймгийн төвийн ундны усны нөөцийг илрүүлж, Олгойн говиос шугам татах ажлыг удирдсан гавьяатай. Өдгөө тэрээр "Шинэ Хархорин" хотын усан хангамжийн судалгаа болон төмөр замын бүтээн байгуулалтын ажилд зөвлөхөөр ажиллаж байна.