Японд цасны гамшгийн улмаас 27 хүн амиа алдаж, цэргийн хүч дайчиллаа
Японы хойд болон баруун бүс нутгийг хамарсан их хэмжээний цас үргэлжлэн орсны улмаас байгалийн гамшигт үзэгдэл нүүрлэж, хүний амь нас эрсдэх тохиолдол нэмэгдсээр байна.
Тус улсын Гал түймэр, гамшгийн менежментийн агентлагийн сүүлийн үеийн мэдээллээр нэгдүгээр сарын 20-ноос эхэлсэн цаг агаарын хүндрэлтэй нөхцөл байдлын улмаас амиа алдагсдын тоо 27-д хүрч, 300 орчим иргэн гэмтэж бэртээд байгаа аж. Цасны зузаан олон жилийн дунджаас хэд дахин давж, дэд бүтэц болон иргэдийн өдөр тутмын амьдралд ноцтой хохирол учруулж эхэлжээ.
Байгалийн гамшигт хамгийн ихээр нэрвэгдсэн бүс нутгаар Нийгата муж нэрлэгдэж байгаа бөгөөд тус мужид 12 хүн амь насаа алджээ. Мөн Акита, Хоккайдо, Аомори зэрэг мужуудад хүний амь нас эрсэдсэн харамсалтай тохиолдлууд бүртгэгдсэн байна. Амиа алдагсдын дийлэнх нь байшингийн дээвэр дээрх цасыг цэвэрлэж байхдаа халтирч унах, эсвэл дээврээс гулсаж буусан их хэмжээний цасанд дарагдах зэрэг шалтгаанаар нас барсан болохыг албаныхан онцолжээ. Түүнчлэн хүйтэн цаг агаарт хүнд хүчир ажил хийх үед зүрхний шигдээс зэрэг эрүүл мэндийн цочмог асуудал үүсэх эрсдэл өндөр байгааг анхааруулж байна.
Цасны зузаан түүхэн дээд хэмжээнд хүрч байгаа нь нөхцөл байдлыг улам хүндрүүлж байна. Тухайлбал, Аомори хотод цасны зузаан 183 сантиметрт хүрсэн нь олон жилийн дунджаас 2.7 дахин их үзүүлэлт бөгөөд сүүлийн 21 жилд тохиолдоогүй рекорд тогтоожээ. Зарим уулархаг бүс нутгуудад цасны зузаан 1.8 метрээс давж, зам тээврийн хөдөлгөөн бүрэн зогсох, иргэд орон гэртээ тусгаарлагдах эрсдэл үүсээд байна. Үүний улмаас "JR Hokkaido" төмөр замын компани 1400 гаруй чиглэлийн хөдөлгөөнийг цуцалж, агаарын тээврийн нислэгүүд олноор хойшлогджээ.
Үүссэн нөхцөл байдалтай холбогдуулан Аомори мужийн захирагч Мияшита Соичиро одоогийн нөхцөл байдлыг "амь насанд заналхийлж буй хямрал" хэмээн тодорхойлж, төв засгийн газраас тусламж хүссэн байна. Энэхүү хүсэлтийн дагуу Японы Өөрийгөө хамгаалах хүчний цэргүүдийг гамшгийн бүсэд дайчилж эхэлжээ. Цэргийн алба хаагчид нэн тэргүүнд өндөр настнуудын амьдардаг байшингийн дээвэр, орц гарцыг цаснаас цэвэрлэх, тусламж шаардлагатай иргэдэд хүрч ажиллахад гол анхаарлаа хандуулж байна. Нийгата муж мөн "Цасны гамшгийн үеийн шуурхай штаб" байгуулж, Гамшгаас аврах тухай хуулийг хэрэгжүүлж эхэллээ.
Японы Цаг уурын агентлагаас ойрын өдрүүдэд цас үргэлжлэн орох төлөвтэй байгааг мэдээлж, цасны нуранги үүсэх болон зам мөстөх аюулаас сэрэмжлэхийг ард иргэдэд зөвлөж байна. Цаг агаарын энэхүү таагүй нөхцөл байдал нь дэд бүтэц, эдийн засагт хохирол учруулаад зогсохгүй, ирэх ням гарагт болох бүх нийтийн сонгуулийн санал хураалтын ирц, зохион байгуулалтад сөргөөр нөлөөлж болзошгүй гэсэн болгоомжлол үүсгээд байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.