ВИДЕО: Францын Ерөнхийлөгч жагсаал зохион байгуулагчидтай уулзахаар болов

Франц улсад дөрвөн долоо хоног үргэлжилж дэлхийн нийтийн анхаарлын төвд орсон шар хантаазтнуудын жагсаал эмх замбараагүй байдлаар үргэлжлэн, эдийн засгийн алдагдалд оруулж байна. Ерөнхийлөгч Эммануэл Макрон жагсаал зохион байгуулж буй үйлдвэрчний эвлэл, ажил олгогчидтой уулзахаар болжээ.

Өнөөдөр Ерөнхийлөгч жагсагчдын шаардлагын хариуд авч хэрэгжүүлэх арга хэмжээгээ танилцуулна. Үүнээс өмнө жагсаал зохион байгуулагчидтай уулзах гэж байна.

Өнгөрсөн бямба гарагт улс орон даяар 136,000 шар хантаазтан жагсаалаа үргэлжлүүлж, 1,200 хүнийг түр саатуулжээ. Нийслэл Парис хотод жагссан 10,000 хүний зарим нь гудамжинд байсан машинуудыг шатааж, дэлгүүрүүдийн цонх хаалга эвдсэн байна.

Макрон таван үйлдвэрчний эвлэл, гурван ажил олгогчтой хийх уулзалтаа орон нутгийн цагаар даваа гарагийн өглөө 10 цагт хийх бол орой 20 цагт телевизээр дамжуулан мэдэгдэл хийнэ. Уулзалтад Засгийн газрын зүгээс Ерөнхий сайд Эдуард Филиппе болон бусад сайд нар байлцана гэжээ.

Францанд дизель түлшний үнэ сүүлийн нэг жилийн дотор 23 хувиар нэмэгдсэний сацуу Ерөнхийлөгч түлш, шатахууны татварыг нэмэхээр шийдсэн нь ард иргэдийн эсэргүүцэлтэй нүүр тулаад байгаа юм.

Шар хантаазаар бэлгэ тэмдгээ болгож, сошиалд нэгдсэн иргэдийн жагсаал Францын ард түмний тууштай занг илтгэж байна уу, аль эсвэл Ерөнхийлөгч туршлагагүйтэв үү гэдэгт ажиглагчид харилцан адилгүй байр суурь илэрхийлж байна.

Эх сурвалж: www.bbc.com