М.Болдбаатар: Татвар төлдөггүй хауснуудаас татвар авдаг болсон учраас нийслэлээс шагнуулсан

Нийслэл болон дүүргүүдийн татварын газрын дарга нар Дубайд аялсан талаар шуугиан цахим орчинд тархаад байгаа. Тэгвэл нийслэлийн Татварын газрын дарга М.Болдбаатар ажлаа хүлээлгэн өгөхөөр Татварын ерөнхий газарт хандаад байна. Энэ үеэр түүнээс хариу тайлбар авсан юм.

Нийслэлийн Татварын газрын дарга М.Болдбаатар: 

-Дүүргийн татварын дарга нарт чөлөө өгсөн. Ёс зүйн хувьд хариуцлагаа хүлээх ёстой. Энэ утгаараа Нийслэлийн татварын газрын даргын албан үүргээсээ чөлөөлөгдөх хүсэлтээ Татварын ерөнхий газарт өглөө.

Татварын албаныхан төрд мөнгө төвлөрүүлэхийн төлөө бүх чадлаараа зүтгэдэг. Хийсэн ажлын үр дүнд суурилан нийслэлээс биднийг дэмжиж туршлага судлах байдлаар Дубай явуулсан. Тодорхой хэлбэл, нийслэл, дүүргийн татварын газар 5.5 их наядыг улс, орон нутгийн төсөвт төвлөрүүлдэг. Үүнээс 3.6 их наяд нь нийслэл, дүүргийн төсөвт төвлөрдөг. Нийслэл, дүүргийн татварын албад өнгөрсөн онд үйл ажиллагаа нь “бүрэн хангалттай” гэж дүгнэгдсэн. Бид нийслэлийн Засаг даргын мөрийн хөтөлбөрт тусгагдсан газар зүйн байршил дээр суурилсан хөрөнгийн тооллогын бүртгэлийг 2025 онд хийсэн. Ингэснээр татварт огт хамрагдаагүй нуугдмал орлогуудыг илрүүлсэн.

Зөвхөн Богд уулыг тойрсон 3300 аж ахуйн нэгж, хуулийн этгээд, иргэний 907 тэрбум төгрөгийн нуугдмал орлогыг илрүүлж, 6.3 тэрбум төгрөгийн татвар төлүүлсэн. Татварын албадын үйл ажиллагаа “сайн” үнэлэгдсэн учраас шагнагдсан гэж ойлгож байна” гэх тайлбар өглөө.