Дуучин Х.Батмэнд: Мандалчуудыг хараагаагүй. Фейсбүүк найзууддаа эрхэлж бухимдлаа гаргасан юм

Дуучин Хумбагарын Батмэнд энэ сарын 23-нд Сэлэнгэ аймгийн Мандал суманд “Заяа дүүрэн Монгол” аялан тоглолтоо хийхээр очсон ч тоглолтын тасалбарыг нь таван хүн авсанд бухимдан цахим орчинд лайв хийсэн нь түгжээ. Тэрбээр энэ талаараа дараах тайлбарыг өгөв.

Дуучин Х.Батмэнд:

-Зүүнхараад хийх тоглолтоо анх арваннэгдүгээр сарын 22-нд зарласан ч Ардын жүжигчин С.Ганзоригийн найранд уригдсанаас болж 23-нд шилжүүлсэн юм. Үүнээс болж цөөхөн хүн тоглолтод маань ирсэн болов уу.
Гэсэн ч маргааш өглөө нь Зүүнхараа руу очиж тоглолтоо хийсэн. Нийт 60 гаруй хүн ирсэн. Тоглолтын дараа үзэгчид тайзны ард ирж миний гарын үсэг, номыг минь авсан.

Бухимдаж лайв хийсэн тухайд, урьд өдөр нь найранд жаахан архи уусан. Өглөө нь Зүүнхараад очиход ч уусан юм гараагүй байсан юм. Тухайн үед таван тасалбар зарагдсан байна гэхэд жаахан бухимдал төрөөд өөрийн цахим хуудастаа лайв хийсэн юм. Орой нь тоглолтод маань 60 гаруй хүн ирсэн нь бүгд миний фейсбүүкийн найзууд байсан. Би цахим орчинд идэвхтэй хүн. Тоглолтын маркетингаа дандаа фейсбүүкээрээ хийчихдэг. Орон нутгийн аялан тоглолтод маань ихэвчлэн цахим найзууд маань ирдэг.

-Та тоглолтын тасалбар зарагдаагүйгээс болж “Мандалчууд хүн муутай” мэтчилэн хараасан байна лээ?

-Хүмүүс буруу ойлгосон байна лээ. Би өөрийн фейсбүүк найзууддаа эрхэлсэн юм л даа. Би өөрийн хуудсандаа маш их цаг гаргаж, ард түмэнд хэрэгтэй монгол өв соёлын талаар бичдэг. Тэр ч утгаараа миний тоглолтын талаар Зүүнхараагийн ард түмэнд түгээгээд өгөөрэй гэж хүссэн. Би мянган хэрэгтэй юм бичихэд нэгийг ч сэвдэггүй хэр нь согтуу хийсэн лайвыг минь тасалж аваад сэвсэн байна лээ. Би их ганцаардмал хүн. Фейсбүүк найзууд маань бусдад нөлөөлж, түгээж дэмжиж өгөөгүйд бухимдсан хэрэг. Миний бичлэгийг мөнгөөр сэвж байгаа сайтуудыг кибер гэмт хэрэгтэй тэмцэх газраас шалгах хэрэгтэй гэв.