🔴 LIVE: УИХ-ын гишүүн Г.Лувсанжамц: Яамдын тоог цөөлж, 1 их наяд төгрөг хэмнэх боломжтой
УИХ-ын гишүүн Г.Лувсанжамц төсвийн урсгал зардлыг хэмнэх боломжийн талаар ярьж, Засгийн газрын бүтцийг цомхон, үр дүнтэй болгох шаардлагатайг онцлов. Тэрбээр сүүлийн арваад хоног Засгийн газрын тухай хууль, яам агентлагуудын чиг үүргийг нухацтай судалсан гэдгээ хэлээд, одоогийн 16 яам, 20 сайд, 50-60 агентлагт давхардсан чиг үүрэг их байгааг шүүмжилжээ.
Гишүүн Г.Лувсанжамцын үзэж буйгаар, яамдын тоог цөөлөх замаар урсгал зардлыг бодитой хэмнэх боломж бий. Тэрбээр, "Аялал жуулчлалын асуудлыг Гадаад хэргийн яаманд шилжүүлбэл оновчтой, учир нь тухайн улстай ЭСЯ-нд байгаа учраас дамжуулан идэвхжүүлэх боломжтой. Соёл, спортын асуудлыг Боловсролын яамны харьяанд оруулбал, Монгол хүүхдүүдийг бага наснаас үндэсний соёлдоо суралцуулж, спортоор хичээллэх дадал суулгахад тохиромжтой" гэж жишээлэв. Мөн Зам тээвэр, Эрчим хүчний яамыг Хот байгуулалт, Барилгын яамтай нэгтгэж, Дэд бүтцийн яам болгох санааг дэвшүүлжээ.
Тэрбээр олон улсын жишгийг дурдаад, "Цөөхөн, цомхон мөртөө чадварлаг гүйцэтгэх засаглал илүү үр дүнтэй байдаг" гэв. Энэ арга хэмжээг хэрэгжүүлбэл 1 их наяд төгрөгийн хэмнэлт гарч, багш нарын цалинг нэмэхэд шаардлагатай 780 тэрбум төгрөгийг олох боломж бүрдэнэ гэж үзэж байна.Үүнээс гадна, төсвийн хөрөнгө оруулалтын тэнцвэргүй байдлыг шүүмжилжээ. "Зам тээврийн хөрөнгө оруулалт 959 тэрбум төгрөг буюу нийт хөрөнгө оруулалтын 35 хувийг эзэлж байна. Харин боловсрол, эрүүл мэндийн салбарын нийлбэр ч энэ хувиас бага. Бид замын хөгжлийг дэмжих үү, хүний хөгжлийг дэмжих үү? Ерөнхий сайд зориг гаргаад бодлогын өөрчлөлт хийвэл, багш нар төдийгүй эмч, сувилагч нарын цалинг үе шаттай нэмэх орон зай гарна" хэмээн мэдэгджээ.
Гэвч цалингийн огцом өсөлт инфляцыг өдөөж, эрсдэл дагуулна гэдгийг анхааруулав. "Монголбанк, Сангийн яамны мэдээллээр, төсвийн урсгал зардал 1 их наядаар нэмэгдвэл инфляц 1.5 хувиар өснө. Хэрвээ 2026 онд цалинг шууд 3.5 сая төгрөг болговол инфляц 10 хувьд хүрч, бодлогын хүү 15-16 хувь, банкны зээлийн хүү 20 хувьд хүрэх эрсдэлтэй. Цалин 3 сая боловч талх 5 мянга болбол хэн ч хожихгүй" гэжээ. Гишүүн Үйлдвэрчний эвлэлтэй уулзсан туршлагаасаа хуваалцаад, Ерөнхий сайд манлайлал үзүүлж, салбарын төлөөлөгчидтэй хэлэлцээ хийх ёстойг онцлов. "Засгийн газар цомхон, ур чадвартай байхад Ерөнхий сайд манлайлах ёстой" хэмээн дүгнэжээ.
Сурталчилгаа
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.