Г.Занданшатарын Засгийн газарт хуучин долоон сайд улирч, шинээр найман сайд МАН-аас орж ирж байна.

УИХ-ын гишүүн, Эрчим хүчний сайдын үүрэг гүйцэтгэгч Б.Чойжилсүрэн:

-Сайдаар томилох асуудлыг би мэдэхгүй. Ерөнхий сайдын бүрэн эрхийн асуудал. Эрчим хүчний салбарын төрийн өмчит компаниудын 66 хувийн хувьцаа эзэмших эрхийг Эрчис Монгол компанид шилжүүлсэн. Харин ТЭЦ 3 дээр осол гарсан. Ингээд маргаан гарч буцаагаад менежментийн эрх яаманд ирсэн. Эвдэрсэн турбиныг засварлах боломжгүй. Шинээр солино. Ослын шалтгааныг тодруулах ажлын хэсэг ажиллаж байна. Засгийн газрын хуралдаанд ойрын хугацаанд оруулж танилцуулна.

Авлига хорооллын эрчим хүчийг яамны зөвшөөрлөөр өгсөн гэдэг асуудал яригддаг. 2015,2018,2022 оны тавдугаар сард дулаан олгох шийдвэр гарсан юм билээ. Урьд нь гарсан шийдвэрээ хуулийн хүрээнд шийдвэрлээрэй гэдэг чиглэл өгсөн.

Өвлийн бэлтгэл ажил маань хоцрогдолтой байгаа нь үнэн. Өмнөх жилүүдэд зургаан сарын 15 гэхэд өвлийн бэлтгэлээ 37-42 хувьтай байдаг байсан бол одоо 20 гаруй хувьтай байна. Бид нөхөж ажиллахыг хичээнэ гэв.

---