МАН-ын Удирдах зөвлөл өнөөдөр хуралдсан бөгөөд Ерөнхий сайд Г.Занданшатарын Засгийн газраа байгуулах хүрээнд барьж байгаа саналыг хэлэлцэн дэмжжээ.

МАН-ын ерөнхий нарийн бичгийн дарга Я.Содбаатар:

-МАН-ын Удирдах зөвлөл ерөнхий сайдын нэр дэвшүүлсэн хүмүүсийг дэмжсэн. Ерөнхий сайд хэд хэдэн асуудлыг дэвшүүлж танилцуулсан. Олон улсын харилцаа, геополитикийн эгзэгтэй нөхцөл байдал үргэлжилж, худалдааны тарифын зөрчилдөөн, уул уурхайн бүтээгдэхүүний зах зээлийн үнийн уналтаас үүдэлтэй эдийн засагт үзүүлэх сөрөг нөлөөллийг бууруулах, төрийн бодлогын тогтвортой байдал, залгамж чанарыг хадгалж, үндэсний эв нэгдлийг хангаж ажиллах нь энэ цаг үед туйлын чухал гэдгийг хэлсэн. Иймд парламентад суугаа намуудтайгаа хамтарч ажиллаж, нэг Монгол байх нь зүйтэй гэдгээ илэрхийлсэн. Ингээд МАН-ын дарга ерөнхий сайдад Засгийн газрын бүрэлдэхүүнд АН-аас бусад намуудтайгаа хамтарч байгуулж болох чиглэлийг өглөө. 

Ерөнхий сайд засгийн газрын бүтэц бүрэлдэхүүнд өөрчлөлт оруулахгүй. Энэ хэвээр нь авч явна. Харин одоо оруулж ирэх төсвийн тодотголтой хамт бүтцийн өөрчлөлт хийнэ. Үндэсний хороодын сайд нарыг томилохгүй. 2024-2028 оны засгийн газрын хөтөлбөрт өөрчлөлт орохгүй. Мега төслүүд үргэлжилнэ. Асуудлаа мэдэж байгаа зарим сайдууд үлдэнэ. Хүн сольж, нэр ус сольж, сандал ширээ зөөх зав байхгүй. Ингээд МАН-ын Удирдах зөвлөл ерөнхий сайдын саналыг дэмжсэн. Одоо ерөнхийлөгчтэй зөвшилцөнө. Үүний дараа парламентад танилцуулаад явна гэв. 

---