МАН-ын бага хурал дараагийн Ерөнхий сайдыг нэр дэвшүүлэх асуудлыг хэлэлцэх гэж байна. УИХ-ын гишүүн асан П.Анужингаас зарим зүйлсийг тодрууллаа.  

УИХ-ын гишүүн асан, МАН-ын бага хурлын гишүүн П.Анужин:

-Ерөнхий сайдыг сонгох амаргүй цаг үед МАН-ын бага хурал хуралдах гэж байна.

Дараагийн ерөнхий сайд бүх ард түмний эв нэгдлийг хангасан, намын гишүүдийн итгэлийг хүлээсэн хүн байх ёстой. Түүнчлэн парламентад суудалтай намуудын итгэлийг хангасан хүн ерөнхий сайдаар сонгох зайлшгүй шаардлагатай байна.

Ерөнхий сайд Л.Оюун-Эрдэнэ сайн ажилласан. Монгол Улсын эв нэгдэл, төрийн тогтвортой байдал гадаад орчинд маш чухал. Манай эдийн засаг, хөгжлийг гадаадын хөрөнгө оруулалтгүйгээр төсөөлөх ямар ч боломжгүй. Гучин жил гацсан томоохон төслүүдийг гаргасан нь үүний үр дүн.

Г.Занданшатарыг Ерөнхий сайдад нэр дэвшүүлсэн гэх асуудлаар мэдээлэлгүй байна.

Миний хувьд анхнаасаа хамтарсан Засгийн газрыг дэмжиж ирсэн. Цаашдаа ч дэмжих болно. УИХ-д хэлэлцэж байгаа хуулиудын босго 68 гишүүнээс бага байгаа тохиолдолд босго давахгүй байгаа шүү дээ. Тэгэхээр цаашдаа ч намууд хамтрах ёстой гэв. 

---