?Л.Оюун-Эрдэнэ: Надад албан тушаалд хорогдоод байгаа зүйл огт байхгүй

Ерөнхий сайд Л.Оюун-Эрдэнэ "Надад албан тушаалд хорогдоод байгаа зүйл огт байхгүй. Зөв дүгнэлттэй үлдэх нь чухал байна. Би хэн рүү ч залгаж ингэ тэг гэж хэлээгүй" гэж чуулганы хуралдааны танхимд хэллээ. 

УИХ-ын гишүүн А.Ариунзаяа:

-Эрх мэдлийн дотоод гадаад эрх ашгаас үүдээд өнөөдрийн нөхцөл байдал үүсчихлээ. Дан ганц цүнхий асуудлаас ч энэ асуудал үүсээгүй гэдгийг дэлгэрэнгүй тайлбарлахгүй бол иргэд сайн ойлгохгүй байна. 

Ерөнхий сайд Л.Оюун-Эрдэнэ: 

-Ерөнхий сайдын хувьд хоёр ч жагсагчидтай уулзаж байсан. Тухайн үед ордон дотор нэгдмэл байр суурьтай байсан. Энэ удаад төрийн ордон хуваагдмал байна. Суурь шалтгаан өөр байсан. Би гарлаа гээд нөхцөл байдал өөрчлөгдөхгүй байсан. Би Ардчилсан нам, ХҮН намд хайртай болсондоо цаг гаргаад байгаа юм биш. Ажлаа хийхийг л хичээж байсан. Олон эрх ашгийн гомдол нийлээд л ийм асуудалд хүрлээ. Жагсаалт дээр ч нам дээрээ олон удаа “амаа алгадуулсан”.

Надад албан тушаалд хорогдоод байгаа зүйл огт байхгүй. Зөв дүгнэлттэй үлдэх нь чухал байна. Хувь хүнийхээ хувьд царай алдаад хөөцөлдөөд л хорогдоод байгаа юм юу ч алга. Үүний үр дагаврыг ерөнхий сайдын хувьд төсөөлөөд, одоо байгаагаас дордох эрсдэл байгаа учраас л итгэл үзүүлэх асуудлыг олон талаас нь бодооч гэж байгаа юм. Би хэн рүү ч залгаж ингэ тэг гэж хэлээгүй гэв.