"Ардчилсан намыг Засгийн газарт байлгаад өгөөч гэж хэзээ ч гуйхгүй. Хорин жил шийдэж чадаагүй асуудлыг арван сарын хугацаанд бид шийдэж чадсан. Үүнийг Монголын түүх дүгнэнэ. Хамтарсан засаг унавал засаглалын хямрал ирэх нь тодорхой" гэж Ардчилсан намын дарга Л.Гантөмөр хэллээ. 

Ардчилсан намын дарга Л.Гантөмөр:

-Бид “Монголын эрх ашиг нэгдүгээрт байна” гэх С.Зориг агсны үгийг байнга ишилж явсан. Энэ ч утгаараа Хамтарсан засгийн газрыг байгуулсан. Энэ засгийн байгуулсан хүний хувьд хэзээ ч урвахгүй гэж бодож байна. Ардчилсан нам ч гэсэн энэ байр суурь дээрээ өнөөдрийг хүртэл байж чадсан. МАН "Ардчилсан намын хэсэг гишүүд нь эсрэг байдаг юм байна. Иймд Хамтарсан засгийн газрын асуудлыг эргэн ярилцъя" гэдэг асуудлаар хуралдаж байгаа юм билээ. Энэ шийдвэрийг хүлээж байна. Шийдвэрт нөлөөлөхийг хүсэхгүй байна. Монголчууд ядуу хэвээрээ үлдэх, асуудал шийдэгдэхгүй үлдсэний хариуцлагыг хэн хүлээх вэ гэдэг чухал. МАН өнөөдрийн хурлаараа Монгол Улсын эрх ашгийг бодож байна уу гэдгээ хараад, дүгнэлтээ гаргах байх.

Манай нам улс төрийн зөвлөлийн хурлаа хийнэ. УИХ-ын гишүүдээ оролцуулж өргөтгөсөн байдлаар хурлаа хийнэ. Бид итгэл үнэмшлээрээ хамтарсан. Улсын эрх ашиг нэгд байна. Харин улсын эрх ашгаас урвасан тохиолдолд эвсэл задрах ёстой. Хамтарсан засаг тарах хэрэгтэй. Намын нэр хүнд, тодорхой хүмүүсийн эрх ашгийн төлөө шийдвэр гаргаж байгаа бол цаашаагаа ингээд л явна. Ардчилсан нам засагт байлгаад өгөөч гэж хэзээ ч гуйхгүй. Хорин жил шийдэж чадаагүй асуудлыг арван сарын хугацаанд бид шийдэж чадсан. Үүнийг Монголын түүх дүгнэнэ.

Хамтарсан засаг унавал засаглалын хямрал ирэх нь тодорхой. МАН шийдвэрээ гараагүй байхад би олон зүйл яримааргүй байна гэв. 

---