Ардчилсан намын гишүүн, дэмжигчид АН-ын дарга Л.Гантөмөр, УИХ-ын гишүүн, УИХ дахь АН-ын бүлгийн дарга О.Цогтгэрэл нарыг Засгийн газраас нэн даруй гарахыг шаардаж, шаардлага гардуулав. 

Ардчилсан намын гишүүн Ц.Уянга:

-Ардчилсан намыг төлөөлөн УИХ-д суугаа 42 гишүүн, түүнийг ахалж байгаа АН-ын дарга Л.Гантөмөр, АН-ын бүлгийн дарга О.Цогтгэрэл нарт шаардлага хүргүүлэхээр өнөөдөр бид нар цуглараад байна.

Шаардлагын агуулга нь улс төрийн өнөөгийн нөхцөл байдал, нийгэмд үүссэн бухимдалтай холбоотой. Энэ асуудалд Ардчилсан намын удирдлагууд МАН-ын улаан хамгаалагч болж, биет төлөөлөгч мэтээр ажиллаж байна. Үүнийг эсэргүүцэж шаардлага хүргүүлж байна.

Ардчилсан намын гишүүн Л.Ганхөлөг:

-Л.Оюун-Эрдэнэ өнгөрсөн таван жил Ерөнхий сайдаар ажиллаж байна. Хөрөнгө орлогын мэдүүлгээс харахад өөрийн орлого нь 200 сая төгрөг, гэр бүлийн орлого нь 15 сая төгрөг боловч олон тэрбум төгрөгөөр хэмжигдэх тансаг зэрэглэлийн худалдан авалтыг түүний хүү О.Тэмүүлэн хийж, олон нийтийн сүлжээнд нийтэлсэн. Үүнээс үүдэн Засгийн газрын тэргүүнийг орлогоо нотлохыг шаардаж, иргэд жагсаж байна. Иргэд зургаа дахь өдрөө жагсаж байна.

Гэтэл үндэсний хэмжээний улс төрийн хүчин болсон Ардчилсан нам таг дуугүй байсаар. АН эдгээр даврал, зах хязгааргүй хулгайд улс төрийн хүчнийхээ үүргийг гүйцэтгэж ажиллахгүй байна.

Иймээс бид Ардчилсан намыг Хамтарсан Засгийн газраас нэн даруй гарахыг шаардаж байна гэв. 

---