УИХ-ын гишүүн Б.Түвшин, Ч.Лодойсамбуу нарын санаачилсан Нийгмийн даатгалын ерөнхий хуульд нэмэлт өөрчлөлт оруулах тухай хуулийн төслийг УИХ-ын даргад өргөн барьсан талаар мэдээлэл хийлээ.

УИХ-ын гишүүн Б.Түвшин:

-УИХ-ын 41 гишүүн нийгмийн даатгалын ерөнхий хуульд нэмэлт өөрчлөлт оруулах хуулийн төслийг УИХ-ын даргад өргөн барилаа.
Эдийн засгийн хямралтай энэ үед ажлын байр нэмэгдүүлэх, иргэдийн бодит орлогыг нэмэгдүүлэх, ажил олгогчийн ажлын байраа нэмэгдүүлэх сэдлийг нь хангах гэсэн үндсэн гурван заалттай.

Албан журмын нийгмийн даатгал авдгийг болиулах санааг оруулсан. Иргэд орлогоосоо 20 хүртэлх хувийн НДШ төлж байгаа нь ажилгүйдлийг ихэсгэх, ажлын байрыг багасгах, хувиараа хөдөлмөр эрхлэгчдийг боомилох арга хэмжээ гэж үзсэн тул энэ заалтыг хасаж байна.

Хоол, унаа ашиглалтын зардлын хөнгөлөлт зэргээс НДШ авахыг болиулах зохицуулалт орж ирж байгаа.

Байгууллагаас төлдөг нийгмийн даатгалын албан журмын хэмжээг хөдөлмөрийн хөлсний доод хэмжээг арав дахин нэмэгдүүлснээр хязгаар тогтоох заалтуудаар нэмэлт өөрчлөлт оруулахаар 41 гишүүн гарын үсэг зурж өргөн бариад байна.

Нийтдээ дээрх гурван заалт 300 гаруй тэрбум төгрөгөөр нийгмийн даатгалын санг бууруулахаар байгаа. Энэ нь нийгмийн даатгалын орлого, зарлагатай харьцуулахад мэдэгдэхүйц дүн биш гэлээ.

---