Нөмрөг-Улаангом чиглэлийн А18 дугаартай авто замаас Арцсуурь хилийн боомт хүрэх хатуу хучилттай авто замын барилгын ажлыг эхлүүллээ. Нээлтийн ёслолд оролцсон Завхан аймгийн Засаг дарга Г.Өнөрбаярын сэтгэгдлийг та бүхэнд хүргэе. "Завханчуудын хувьд түүхэн өдөр тохиож байна" гэж тэрбээр үзэж байна. 

Завхан аймгийн Засаг дарга Г.Өнөрбаяр: 

-Манайх өмнө нь Увс, Архангай аймагтай холбогдсон байсан бол энэ удаад Говь-Алтай аймагтай холбогдох гэж байна. Завхан аймаг Арцсуурь гээд ганцхан хилийн боомттой. Алтай хүртэлх болон хилийн боомтын замыг завханчууд 30 жил ярьж хүлээж байсан. Түүхэн бүтээн байгуулалт гараанаас хөдөлсөнд их баяртай байгаа. 

Энэ замууд баригдсанаар хоёр чухал ач холбогдолтой. Нэгд, хойшоогоо Туватай, баруун тийшээ Алтайгаар дамжиж Бургастайн боомтоор БНХАУ-тай холбогдох боломжтой болж байна. Хоёрт, энэ замууд тавигдах маршрутад арав орчим сум холбогдож байгаа.  Тэр дотроо Завхан аймгийн хойд талын таван сум хатуу хучилттай авто замд холбогдох болно гэв. 

---