Жүдо бөхийн Душанбегийн их дуулга тэмцээнд монголын баг, тамирчид амжилт дүүрэн оролцож байна. 

Эхний хоёр өдрийн дараах байдлаар тэмцээнийг зохион байгуулагч Тажикстан улсын баг гурван алт, хоёр мөнгө, гурван хүрэл медаль хүртсэн амжилтаар багийн дүнгээр тэргүүлж байгаа бол манай баг, тамирчид хоёр алт, нэг мөнгө, нэг хүрэл медаль хүртсэн амжилтаар гуравдугаарт эрэмбэлэгдэж байна. 

Өчигдөр эмэгтэйчүүдийн -63кг жинд Б.Ганхайч алтан медаль хүртсэн бол эрэгтэйчүүдийн -73кг жинд Б.Эрдэнэбаяр мөнгөн медаль хүртсэн юм. Тэгвэл өнөөдөр тэмцээний сүүлийн өдөр хүнд жингийн барилдаанууд явагдах ба манай улсаас гурван бөх хүч үзнэ. 

Эрэгтэйчүүдийн -90кг жинд:

Залуучуудын Ази тивийн хошой хүрэл медальт залуу бөх Ц.Ган-Эрдэнэ энэ жинд хүч үзэх ба эхний тойрогт өнгөрсөн онд Душанбегийн их дуулгын хүрэл медальт тэмцээнийг зохион байгуулагч Тажикстаны залуу бөх А.Мухаммаджонтой барилдах оноолттой байна.

Эмэгтэйчүүдийн -78кг жинд:

Залуу бөх Ж.Урангоо хүч үзэх ба эхний тойрогт БНХАУ-ын залуу бөхтэй хүч үзэх ба хэрэв түүнийг ялвал энэ жинг тэргүүлэн барилдаж буй Европын хошой аварга Германы Б.Алинатай барилдана. 

Эмэгтэйчүүдийн +78кг жинд:

Улаанбаатарын их дуулгын хүрэл медальт Д.Номинзул эхний тойрогт IJF_ийн нэр дээрээс барилдаж буй Д.Алфиатай барилдах оноолттой байна.