Шатахуун тээвэрлэж явсан машин замын хажуу руу унаж, таван тонн шатахуун асгарчээ
Өвөрхангай аймагт шатахуун тээвэрлэж явсан автомашин замын зорчих хэсгийн хажуу тал руу унаж, тээвэрлэж явсан 30 тн шатахуунаас 5 тн орчим шатахуун асгарчээ.
Тодруулбал, Өвөрхангай аймгийн Хужирт сумын Уужим багийн нутаг сумын төвөөс баруун зүгт 30 км-т орших Тээлийн-Ам хэмээх газарт Улаанбаатар хотоос Өвөрхангайн Бат-Өлзий сумын чиглэлд шатахуун тээвэрлэж явсан автомашин замын зорчих хэсгийн хажуу тал руу унажээ.
Энэ тухай дуудлагыг Онцгой байдлын алба 12-р сарын 11-ний 16:40 цагт хүлээн авчээ. Дуудлагын дагуу тус аймгийн Онцгой байдлын газрын Хужирт сум дахь бүлэг, Цагдаагийн тасаг, сумын мэргэжлийн ангийн алба хаагчид очсон байна.
Тус газарт очиход иргэн Б-гийн “Beiben north benz ND4182” загварын автомашины зүтгүүрийн чиргүүл автозамын хажуу тал руу унаж, тээвэрлэж явсан 30 тн шатахуунаас 5 тн орчим шатахуун тагаараа асгарсан байжээ. Алба хаагчид чиргүүлийг татан босгож, асгарсан шатахууныг саармагжуулах ажиллагааг зохион байгуулсан гэж ОБЕГ-аас мэдээлэв.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.