Хорт хавдрын эсийг 10 минутанд оношилно

Хорт хавдар гэгч аймшигт үг хортон шавжнаас ч түргэн тархаж, эрдэнэт хүний амийг авсаар байна. Урьдчилан сэргийлэх нь зайлшгүй ч нэгэнт өвчилсөн бол эрт илрүүлэг оношилгоо чухал.

Австралийн эрдэмтэд хүний биед хорт хавдар үүсч эхэлсэн эсэхийг ердөө 10 минутад илрүүлэх боломжтой тест боловсруулжээ. Күйнслэнд их сургуулийн эрдэмтэн судлаачид хорт хавдрын маш ховор ДНК-ын бүтцийг нээснээр уг тестийг боловсруулсан байна.

Хорт хавдрын ДНК-ын ховор бүтцийг тодорхойлох боломжтой болсноор хүний биед хавдрын эс байгааг одоо хэрэглэж байгаа аргуудаас хамаагүй эрт оношлох боломжтой.

Уг ДНК-ын бүтэц нь энгийнээс огт өөр байдаг аж. Хорт хавдрыг үнэ өртөг багатай, илүү хялбар аргаар илрүүлэх боломжтой болсон нь шинжлэх ухааны түүхэнд маш чухал олдвор юм. Энэ аргыг цаашид хөгжүүлбэл гар утсаараа ч та биеийн тань хаа нэгтээ хавдрын эс нуугдаж буйг мэдэж чадна.

Энэ оны эхэнд Америкийн Жон Хопкинсийн их сургуулийн эрдэмтэн судлаачид “хорт хавдар хайгч” цусны тестийг хөгжүүлж, хамгийн түгээмэл байдаг найман төрлийн хавдрыг эрт илрүүлэх боломжтой гэдгийг мэдэгдэж байсан юм.

Одоогоор Австралийн эрдэмтдийн нээсэн аргыг иргэдэд хэрэглэж эхлээгүй байна. Өвчтнүүдэд шууд ашиглахаас өмнө клиникийн туршилт явуулах шаардлагатай.

10 минутын дотор хорт хавдрын эсийг 90 хувийн чадамжтайгаар илрүүлнэ. Одоогоор хөх, түрүү булчирхай, хэвлийн хорт хавдруудыг илрүүлэх боломжтой ч цаашид бусад төрлийн хавдруудыг илрүүлэх хүртэл хөгжүүлнэ гэжээ.

Эх сурвалж: www.cnn.com