"Хүннү 2222" хороолол орчимд Орчлон сургуулийн зүүн талд барилга барьж буй ААН-үүд борооны ус зайлуулах шугам хоолойг тасалж, хөрсний усаа авто зам руу хаяж байсан зөрчлийг арилгуулж байна. Цаашид барилга барьж буй ААН-үүд хөрсний усаа хэрхэн гаргаж байгаад холбогдох байгууллагуудаас хяналт шалгалт хийх юм. Нийслэлийн Засаг дарга бөгөөд Улаанбаатар хотын захирагч Х.Нямбаатар өнөөдөр газар дээр нь ажиллалаа.

Хүннү 2222 хорооллын арын зам дээр өнгөрсөн жилээс эхэлж ус тогтож авто, зам болон явган зам эвдэрч эхэлсэн бөгөөд ГУББГ аас үзлэг шалгалтаар Тэсо группын хэрэгжүүлж байгаа Альфа зоне төсөл Суруга Монголын авто замын борооны ус зайлуулах 500 диаметртай бетонон хоолойг дээрээс нь цоолж шугам хоолойд хөрсний ус шахсан зөрчил илэрч байсан. Энэ жил мөн тус байршилд бороо орох болгонд ус ихээр тогтсон бөгөөд 2024.08.17 ны өглөөнөөс эхлэн үзлэг шалгалтыг холбогдох байгууллагууд зохион байгуулахад Тэсо группын альфа зоне төсөл зөрчлөө арилгаагүй, мөн MCS пропертийз ХХК ийн хэрэгжүүлж буй орчлон сургуулийн өргөтгөлийн талбайд борооны усны 500 шугам хоолойг ухаж гаргаж тасдан, хөрсний ус ихээр шахаж байсан зөрчил илэрсэн. Холбогдох байгууллагууд ажиллаж байна.

Нийслэлийн Засаг дарга Х.Нямбаатар:            

-Борооны ус зайлуулах шугам руу энэ хавийн бүх барилгын компаниуд усаа хийснээр "Хүннү 2222" хорооллын хойд талд ус тунах гол эх үүсвэр болж байгаа юм. Мөн ТЭСО группийн барьж буй барилгын төслийн компани зардлаа хэмнэх үүднээс нийтийн зориулалтын борооны ус зайлуулах шугамыг эвдэж өөрсдийн хөрсний ус зайлуулах шугамаа холбочихсон байна. Шугам хоолой ачааллаа дийлэхгүй нийтийн эзэмшлийн зам, явган хүний зам руу ус нь хальж гараад байна.

Тэгэхээр өнөөдрөөс ТЭСО группын энэ барилгын төслийн ажлыг улсын байцаагчийн акт үйлдэж, өнөөдрөөс зогсоолгож байна.

Мөн өмнө нь төлбөр төлж, ус зайлуулах шугам руу хөрсний усаа зайлуулах  ёстой байсны төлбөр, торгуулиудыг тавихыг нийслэлийн Стандартын газрын даргад үүрэг болгож байна гэв. 

---