Эверестийн оргилд гарах оролдлого хийх үедээ сураггүй алга болсон хоёр Монгол уулчны нэгийнх нь цогцсыг олсон гэж "Everest Today" цахим хуудас мэдээлжээ.

Дэлхийн дээвэр Эверестийн оргил руу хүчилтөрөгчийн баггүйгээр авиралт хийхээр эхлүүлсэн уулчин Л.Пүрэвсүрэн, Ц.Өсөхжаргал нар энэ сарын 12-наас хойш сураггүй болсон. Аврагчид өнөөдөр өглөө Эверестийн оргилын 8550 метр орчмоос Ц.Өсөхжаргалын цогцсыг олсон талаар "Everest Today" цахим хуудас мэдээлжээ.

Тэрээр олсноосоо унаж хэдхэн метрийн гүнд гацсан байдалтай олджээ. Аврагчид түүний цогцсыг аюулгүй байршуулсан бөгөөд хохирогчийн ар гэрийнхэнтэй тохиролцсоны дараа цаашид арга хэмжээ авах болно гэдгээ хэлсэн байна.

Аврах ажиллагаанд оролцож буй Шерпа "Уулчин Л.Пүрэвсүрэнгийн хувь заяа одоогоор тодорхойгүй байна. Тавдугаар сарын 19-нд оргилд гарах дараагийн цонх нээгдэнэ. Тэр үед уулчныг эрэн хайх ажиллагааг үргэлжлүүлнэ" гэж мэдээлжээ. 

---