Сүхбаатар аймгийн Түмэнцогт, Эрдэнэцагаан, Сүхбаатар сумдад өчигдөр /2024.04.10/ ой хээрийн түймэр гарч, урьдчилсан байдлаар 331 га талбай өртсөн байна.

Тодруулбал, тус аймгийн Түмэнцогт  сумын Баянцагаан багийн "Холбоо" гэдэг газар 11:06 цагт гарсан хээрийн түймрийн дуудлагаар  Онцгой байдлын газрын Түмэнцогт сум дахь Эрэн хайх, аврах бүлгийн  алба хаагчид ажиллаж, 12:40 цагт бүрэн унтраасан.

Мөн Эрдэнэцагаан сумын Бадрах багийн "Төмөрт" гэдэг газар 11:30 цагт гарсан хээрийн түймрийн дуудлагаар Гал түймэр унтраах, аврах 47 дугаар ангийн алба хаагчид ажиллаж, 13:30 цагту унтраасан бол Сүхбаатар сумын Хулгар багийн “Дармийн шанд” гэдэг газар 13:06 цагт гарсан хээрийн түймрийн дуудлагаар тус сумын мэргэжлийн ангийнхан ажиллаж, 14:20 цагт тус тус бүрэн унтраажээ.

Нийслэлийн хэмжээнд он гарсаар шар өвс шатсан 9 удаагийн дуудлага бүртгэгдсэн байна. Өнгөрсөн хоногт шар өвс шатсан хоёр дуудлагаар алба хаагчид шуурхай ажиллаж бүрэн унтраажээ. 

---