“Ногоон автобус”-ны хэргийн хохиролд “Тэнүүн огоо” ХХК-ийн хөрөнгийг нийслэлд шилжүүлж буй асуудлаар Нийслэлийн Засаг даргын орлогч П.Сайнзоригоос тодрууллаа.

Нийслэлийн Засаг даргын орлогч П.Сайнзориг:

-“Тэнүүн огоо” ХХК нь Нийслэлийн худалдан авах газартай том болон дунд оврын автобус худалдан авах гэрээ хийсэн. Энэ гэрээний хэрэгжилттэй холбоотой тодорхой асуудлаар гарч ирээд зарим гэрээг цуцалсан. Тус гэрээний дагуу дунд оврын болон цахилгаан автобуснууд нийлүүлэгдсэн. Энэ автобуснууд нь түрүүлээд үйлчилгээнд гарсан байсан. Дунд оврын автобустай холбоотой гарсан зөрчлийг автобус нийлүүлсэн компани болон хууль хяналтын байгууллагад асуудлыг өгсөн.

Харин дизель автобустай холбоотой асуудлыг бүрэн цуцалсан. Энэ автобуснууд нь угсарсан автобуснууд байж болзошгүй байсан учраас гэрээг цуцалсан. Тус компаниас тендерийн баталгаа болгож тавьсан байсан 11.5 тэрбум орчим төгрөгийг нь царцаагаад улсын төсөв рүү татсан. Үлдэгдэл 76 тэрбум төгрөгийн хохирол дээр нь яг нийтийн тээвэртэй холбоотой үл хөдлөх хөрөнгүүдийг нь үнэлж авах асуудал хууль хяналтын байгууллага шалгаж байх явцад яригдсан. Аливаа этгээд хуулийн байгууллагад шалгагдаж байх явцдаа хохирлыг барагдуулах боломжтой.

“Тэнүүн огоо” компанийн үл хөдлөх хөрөнгийг АТГ-аас томилсон, Сангийн яамнаас эрх авсан үл хөдлөх хөрөнгийн үнэлгээний компаниар нэг бүрчлэн үнэлүүлсэн. “Зарим хөрөнгө үнэлэгдээгүй байна” гэдэг гомдлыг “Тэнүүн огоо” компанийн захирал Ганхуяг тавьсан. Гомдлыг хүлээж аваад, магадалж шалгаад эдгээр хөрөнгүүдийг 75 тэрбум орчим төгрөгөөр үнэлж байгаагаа хөрөнгийн үнэлгээний компани гаргаж ирсэн. Ийм байдлаар нийслэлийг хохиролгүй болгох ажлыг зохион байгуулж байна.

Тус компанийн үл хөдлөх хөрөнгүүд нь автобус баазууд, засвар үйлчилгээний төвүүд бий. Энэ хөрөнгүүд нь эргээд нийтийн тээврийн үйл ажиллагааг тасралтгүй явуулахад чухал байна гэв.

---