Ардчилсан намын 34 жилийн ойн өдөр өчигдөр тохиож, АН-ынхан ойн баяраа тэмдэглэсэн юм. АН-ын дарга Л.Гантөмөр намын тамгаа хүлээн аваад бүтэн жилийн хугацаа өнгөрсөн байна. Түүнд намынхан нь сайн, муу үнэлгээг аль алиныг нь өгч ирсэн. Харин Хотын дарга асан Э.Бат-Үүл түүнд ам сайтай байгаагаа илэрхийлжээ.

Хотын дарга асан Э.Бат-Үүл:

-Үнэндээ би Л.Гантөмөрийг манай намын дарга болоход нь хулгайч төртэй тэмцэх тэмцэлд намаа нэгтгээд удирдаад авч явж чадах манлайлагч болж чадна гэдэгт итгэхгүй байсан. Тэр тусмаа япон боловсрол, хүмүүжил нь түүнийг хэтийдсэн аядуу, хүлээцтэй болгосон доо гэж хардаж байв.

Гэтэл би эндүүрсэн бололтой.Тэр яван байж чангараад байна!

Сүүлийн үед түүний байр байдлыг харахад С.Зориг шиг тогтуун, Элбэгээ шиг ортол илтгэгч, Баабар шиг цараатай, Гончигдорж шиг нягт сэтгэлгээтэй жентелмен болоод байна. Ямар ч байсан бидний эхэлсэн үйл хэргийг нэр төртэй аваад явах шинэ үеэр намаа сэлбэнэ гэсэн амандаа хүрчээ! гэв. 

---