Тээврийн цагдаагийн албаны дарга, хурандаа Д.Оюутболдыг үүрэг ажлаас нь чөлөөлжээ. Тодруулбал, 03 дугаар сарын 12-ны өдөр буюу өчигдрөөс эхлэн замын хөдөлгөөний зохион байгуулалтыг түр хугацаагаар өөрчлөн зохион байгуулсан. Гэтэл тус зохицуулалтаас үүдэлтэйгээр хоёр хоног замын хөдөлгөөн тэг зогсолтод хүртлээ түгжирч, иргэдийн бухимдлыг барав. Уг зохицуулалтаа Тээврийн цагдаагийн албанаас өөрийн эрх үүргийн хүрээнд хийж хэрэгжүүлсэн. Засгийн газар, НЗДТГ, яамдтай зөвлөлдөөгүй хэрэгжүүлсэн ажил, түгжрэл тодорхой цэгт буурвал уг туршилтаа үргэлжлүүлнэ хэмээн өнөөдөр өглөө мэдэгдсэн юм.

Тэгвэл Хууль зүйн сайд Б.Энхбаяр, Тээврийн цагдаагийн албаны дарга, хурандаа Д.Оюутболдыг чөлөөлөх үүргийг ЦЕГ-ын даргад өгчээ.

Тэрбээр “Нийслэлийн замын хөдөлгөөнд зохицуулалт хийх талаар нийслэлийн иргэд, эрхэлсэн сайд, Нийслэлийн Засаг даргад урьдчилж танилцуулалгүйгээр арга хэмжээ авч, иргэдийн бухимдуулсан ЦЕГ-ын Тээврийн цагдаагийн газрын даргыг ажлаас чөлөөлөх арга хэмжээ авч, хариуцлага тооцохыг ЦЕГ-ын даргад үүрэг болгов. “Туршилт”-ыг зогсоосон. Ажил, амьдралаа урьдчилан төлөвлөх боломж, мэдэх эрхээр иргэдийг хангалгүй, зохион байгуулалтын алдаа гаргасан явдалд нийслэлчүүдээсээ хүлцэл өчье” гэжээ.

---