ТЦА-аас нийслэлийн төвийн зарим замын зорчих хэсгийг өөрчлөх туршилтыг өчигдөр хийж хэрэгжүүлсэн. Энэ нь олон нийтийн бухимдлыг ихээхэн төрүүлж, туршилт хийхээ урьдчилан мэдэгдэх, иргэдийнхээ эрхэнд халдсан гэнэтийн шийдвэрүүдийг гаргахгүй байхыг ч хотын дарга Х.Нямбаатарт хаягласаар байв. Гэсэн ч тус шийдвэрийг ТЦА-аас хуулийн хүрээнд хийж хэрэгжүүлсэн арга хэмжээ бөгөөд цаашид ч энэ төрлийн замын хөдөлгөөний чиглэлийг өөрчлөх,  зорчих хэсгийн зарим хэсгийг түр хязгаарлах арга хэмжээг тогтмол авч хэрэгжүүлнэ гэдгээ Тээврийн цагдаагийн албанаас мэдэгдлээ. 

Тээврийн цагдаагийн албаны дарга, хурандаа Д.Оюутболд:

-Тээврийн цагдаагийн албанаас зарим замын хөдөлгөөний зохион байгуулалтыг түр хугацаагаар өөрчлөн зохицуулсан. Энэхүү туршилтаа нийслэлийн замын хөдөлгөөний түгжрэл, ачааллыг бууруулах зорилготой юм. Чингисийн өргөн чөлөөнд хийж хэрэгжүүлсэн хөдөлгөөн зохицуулалтыг цагдаагийн байгууллага өөрийн эрх үүргийн хүрээнд хийж хэрэгжүүлсэн. 

2024 оны эхний хоёр сарын байдлаар урсгал сөрсөн арван зөрчил тохиолдол бүртгэгдсэн. Оргил цагийн түгжрэлийг бууруулах үүднээс хийж хэрэгжүүлсэн арга хэмжээ гэж ойлгож болно. Урьдчилан мэдээлэхгүйгээр яг түгжрэл үүссэн нөхцөл байдал дээр арга хэмжээ авч ажиллана. Эдгээр замуудын түгжрэл бусад замд ачаалал үүсгэж эхэлсэн тохиолдолд бид энэхүү арга хэмжээгээ зогсоож байгаа. Хэрэв энэхүү арга хэмжээний үр дүнд авто замын ачаалал буурсан үр дүн үзүүлсэн тохиолдолд эрх бүхий байгууллагад саналаа хүргүүлнэ.

Энэхүү туршилтыг иргэдийн хүсээд байгаа түгжрэлийг бууруулах зорилготойгоос гадна алба хаагчдынхаа биеэр зохицуулалт хийх хугацааг багасгах үүднээс хийж хэрэгжүүлж байгаа гэдгийг та бүхэн ойлгох хэрэгтэй.

ТЦА-аас замын хөдөлгөөний чиглэлийг өөрчлөх,  зорчих хэсгийн зарим хэсгийг түр хязгаарлах арга хэмжээг тогтмол авч хэрэгжүүлнэ. Хэзээ хаана ямар зам дээр гэдгийг урьдчилан хэлэх боломжгүй гэв. 

---