Улаанбаатар хотод үүссэн халиа тошинг арилгах, шар усны үерээс урьдчилан сэргийлэх ажил болон мал аж ахуйн хаваржилтын нөхцөл байдал, хэрэгжүүлж буй ажлын хэмжээний талаар Нийслэлийн Онцгой комиссоос мэдээлэл өгчээ.

Улаанбаатар хотын хүн ам жилд 40 мянгаар нэмэгдэж байгаагаас 75 хувь нь хөдөө орон нутгаас шилжин ирдэг бөгөөд гол, сайр, жалга судгийн дагуу суурьшин, гэр хорооллыг тэлж, үерийн эрсдэлд өртөх магадлалыг нэмж байна. Нийслэлийн халиа тошин, шар усны үерийн өртөх байдлын үнэлгээгээр 3947 объект өртөх тооцоо гарчээ. Баянзүрх, Сонгинохайрхан, Чингэлтэй, Сүхбаатар дүүргийн аюулын индекс маш их байгаа бол Багануур дүүрэг их, Хан-Уул, Баянгол дүүрэг дунд, Баганхангай, Налайх дүүрэг бага түвшинд байна. Харин нийслэлийн үерийн эрсдэлийн индекс 8.65 буюу маш их түвшинд байгаа юм.

Нийслэлийн 24 хорооны 33 байршилд халиа тошин үүссэнээс 25-ыг нь дүүргүүд, наймыг нь Геодези, усны барилга, байгууламжийн газар хариуцан ажиллаж байна. Шар усны үерт өртөх эрсдэлтэй 2316 нэгж талбарт 1487 өрх байгаагаас 388 нэгжийн газрыг ашиглаж буй иргэд газрын зөвшөөрөлгүй байгаа юм. Иймд шар усны үерээс урьдчилан сэргийлэх зорилгоор халиа тошин үүссэн байршил дахь мөсийг хоёрдугаар сарын 15-наас гуравдугаар сарын 6-ны хооронд зөөж тээвэрлэсэн. Энэ хүрээнд 20 аж ахуйн нэгж, байгууллагын 350 ажилтан 235 техник хэрэгсэлтэйгээр ажиллаж, 11091 рейсээр 221820 тонн мөсийг тээвэрлэсэн байна.

Мөн Баянзүрх дүүргийн 150, Чингэлтэй дүүргийн 139, Сүхбаатар дүүргийн 40, Сонгинохайрхан дүүргийн 135 буюу нийт 464 айлд мэдэгдэл хүргүүлжээ. 

---