УИХ-ын энэ оны нэгдүгээр сарын 11-ний өдрийн 04 дүгээр тогтоолоор Төсвийн тогтвортой байдлын зөвлөлийн шинэ гишүүдийг томилсон. Төсвийн тогтвортой байдлын зөвлөл анхдугаар хуралдаанаа хийж, даргаараа эдийн засагч Н.Энхбаярыг сонгосон юм. Төсвийн тогтвортой байдлын зөвлөлийн дарга Н.Энхбаяр хөгжлийн бодлогод техник, технологийн шинэчлэл хийх хэрэгтэй байгаа талаар онцолжээ. 

Төсвийн тогтвортой байдлын зөвлөлийн дарга Н.Энхбаяр:

-Сүүлийн жилүүдэд Монгол улсын гадаад худалдааны эргэлт эрчимтэй нэмэгдсээр байна. Өнгөрсөн 2023 онд экспортын орлого 21 хувиар нэмэгдсэн бол экспортод гаргасан нүүрсний биет хэмжээ хоёр дахин, төмрийн хүдрийн биет хэмжээ 20.7 хувиар нэмэгджээ. Аж үйлдвэрийн бүтээгдэхүүний үйлдвэрлэл ч хурдтай нэмэгдэж байна. Ийнхүү нэмэгдэхийн тулд их хэмжээний бараа түүхий эд, сэлбэг хэрэгсэл, материалыг тээвэрлэх шаардлага үүссээр байна гэсэн үг юм.

Саяхан хэвлэл мэдээлэлд гарч буй мэдээллээс үзвэл УБТЗ-аар тээвэрлэсэн ачаа 2020 онд 30.0 сая тонн байсан бол 2023 онд 32.4 сая тонн болж гурван жилийн дараа найман хувиар нэмэгдсэн ажээ.

Бусад улс орны хөгжлийн түүх, амжилттай хөгжсөн жишээнээс үзвэл суурь дэд бүтэц буюу цахилгаан эрчим хүч, тээврийн салбар нь бусад салбараас түрүүлэн хөгжиж, техник технологийн шинэчлэл хийгдэж байх учиртай.

Манай төмөр замын тээвэрлэлт, боруулалтын орлого нэмэгдэж байгаа боловч эдийн засгийн өсөлтийн өнөөгийн хурдыг гүйцэж чадаж байна уу, хоцрогдож байна уу гэдгийг сайтар бодож тунгаан ирэх жилүүдийн хөгжлийн бодлогод техник, технологийн шинэчлэлийг хийх гарцаагүй шаардлага тулгарч байгааг анхаарна уу гэжээ.

---