Нийтийн тээврийн автобус нийлүүлэх тендерт шалгарсан Yutong Bus Co,Ltd гэрээнд заасан хугацааны дагуу эхний ээлжийн автобуснуудыг нийлүүлж эхлээд буй. Эхний 35 автобусыг Зорчигч тээврийн нэгтгэл ОНӨААТҮГ-т хуваарилж, иргэдэд үйлчилж эхэлсэн. Нэгдүгээр сард багтаан 500 автобусыг нийлүүлж дуусна хэмээн Хотын дарга хэллээ.

Нийслэлийн Засаг дарга бөгөөд Улаанбаатар хотын Захирагч Х.Нямбаатар:

-Маргааш шинэ 50 автобус Улаанбаатар хотод орж ирнэ. Мөн энэ сарын 12-нд дахин 50 автобус ирнэ. Хоногийн зайтай 50 50 автобуснууд орж ирснээр хоёрдугаар сарын 1-нээс өмнө 500 автобус нийлүүлэгдэж дуусна. Шинээр орж ирж буй автобуснуудын тоонд уялдуулж нийтийн тээврийн богино эргэлтийн чиглэлүүдийг эхлүүлнэ.

Хоёрдугаар сарын 1-нээс нийтийн тээврийн нэг удаагийн зорчилтыг 1000 төгрөг болгож, тухайн өдөртөө 4 удаа дамжин суух эрх олгоно. Нийтийн тээвэрт үнэ төлбөргүй зорчдог иргэдийн картыг дээр дурдсанаар цэнэглэж өгнө гэлээ.

---