Хянан шалгах Түр хорооноос зохион байгуулж буй нүүрсний хоёр дахь шатны сонсгол үргэлжилж байна. Энэ үеэр "Эрдэнэс Тавантолгой" ХК-ийн БЭТ Ж.Ганбат "2.5 сая иргэнд 1072 хувьцааны ногдол ашиг тараах асуудал яригдаж байгаа" гэж мэдээлэв. 

“Эрдэнэс Тавантолгой” ХК-ийн БЭТ Ж.Ганбат:

-2022 онд 1.2 их наяд төгрөгийн ашигтай. 2023 оны гуравдугаар улирлын байдлаар 2.7 их наяд төгрөгийн ашигтай ажилласан. Ногдол ашиг тараах асуудлаар ТУЗ-дөө танилцуулна. 

2012 оны дөрөвдүгээр сараас өмнө төрсөн 2.5 сая иргэнд ногдол ашиг тараах тараах асуудал яригдаж байгаа. Мөн энэ оны ашгаас ирэх хавар ногдол тараах асуудал дахиад яригдана. Энэ компанийг бизнесийн зарчмаар хөгжүүлье гэдэг дээр Засгийн газар дээрээ тохирсон.

Түүнчлэн “Эрдэнэс Тавантолгой” ХК-ийг санхүүгийн хүндрэлтэй байдалд оруулахад өөрийн үндсэн үйл ажиллагаатай шууд хамааралгүй төслүүдэд санхүүжүүлэгчээр оролцуулсан байдал нөлөөлсөн. Жишээлбэл, Газрын тосны дамжуулах хоолойн төсөл, Тавантолгой түлш байна. Тавантолгой ХК-ийг нийслэлд хүлээлгэн өгөх асуудлыг Засгийн газарт тавьж байгаа. “Эрдэнэс Тавантолгой” ХК өөрийн бизнесийн зарчмаараа үндсэн үйл ажиллагаа явуулаад, өргөжүүлэхэд ашиг тусаа өгөх төслүүдийг санхүүжүүлэх ёстой. Өөрт хамааралгүй эдгээр төслүүдийг санхүүжүүлээд асар хүнд байдалд орсон. Өөрсдөө  засаглалын хувьд бүрэн зөв болоогүй, санхүүгийн хувьд эрсдэлтэй байдалд байна. Одоо дахин ийм төсөлд оролцохгүй. Нэгэнт энэ төсөлд орчихсон учраас дуусгах нь ойлгомжтой. Харин эдгээр төслүүдэд зарцуулсан нэг төгрөгөө ч манай компани буцаан авах ёстой гэв. 

---