Төрийн албаны 2023 оны дөрөвдүгээр улирлын ерөнхий шалгалт орон даяар эхэллээ.

Улаанбаатар хотод ерөнхий шалгалтыг өгөхөөр 1594 хүн бүртгүүлсэн байна. Шалгалт Яармаг дахь Нийслэлийн нутгийн захиргааны  цогцолборт болох бөгөөд 22-24 хүртлэх өдрүүдэд зохион байгуулахаар Төрийн албаны зөвлөлийн Нийслэл дэх салбар зөвлөлөөс бэлтгэл ажлыг хангаад байна. 

Төрийн албаны тухай хуулийн дагуу ерөнхий шалгалтыг улиралд нэгээс доошгүй удаан зохион байгуулах ёстой бөгөөд, энэ жил  4 дэх удаагаа зохион байгуулж буй нь энэ юм. Шалгалт өгөхөөр бүртгүүлсэн иргэд Төрийн албаны зөвлөлийн цахим бүртгэлийн хайлтын хэсэгт өөрийн регистрийн дугаарыг хийж, шалгалт өгөх хуваариа харах боломжтой аж. 

Шалгалтыг нээж Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч О.Номинчимэг

“Бүртгүүлсэн хүмүүсийн тооноос харахад төрийн албанд орох хүсэл сонирхол, эрмэлзэл их байгаа нь харагдаж байна. Өдгөө нийслэл Улаанбаатар хотын 1.6 сая иргэнд үйлчилгээ үзүүлдэг төрийн 600 гаруй байгууллагад 60 мянга орчим албан хаагч ажилладаг. Иймд иргэдийн төлөө гэсэн сэтгэлтэй, шударга зүтгэлтэй, ёс зүйтэй төрийн албан хаагч бол нийслэлийн баг бүрэлдэхүүний тулгуур багана юм. Төрийн алба тогтвортой, чадвартай, мэргэшсэн байснаар монгол төрийн бодлогын залгамж халааг, тогтвортой байдлыг хадгална. Энэ ч утгаараа төрийн албыг бэхжүүлэх тодорхой зорилт, стратегийг бодлогын баримт бичгүүдэд тусгасан билээ. Төрийн албаны ерөнхий шалгалт 2019 оноос хойш бүрэн цахимжсан. Ингэснээр бүх үйл явц техник технологийн шийдлийн дагуу, тухайн хүний мэдлэг чадварыг аливаа нөлөөгүй, хараат бусаар шалгах тогтолцоонд шилжсэн юм” хэмээлээ.

Монгол Улсын Төрийн албаны зөвлөлийн дарга, тэргүүн зэргийн түшмэл Б.Баатарзориг

“Эл шалгалтыг улирал бүр авдаг болсон жишгийг тогтоосон нь энэ жилийн шалгалтын онцлог. Төрийн албаны ерөнхий шалгалтад тэнцэгчдийн хувь жилээс жилд өсөж байгаа. Шалгалтыг цахимжуулж эхэлж байхад нийт тэнцэлтийн хувь найм байсан бол мэргэжил аргазүйн зөвлөгөө өгч, бэлтгэл ажлыг орон даяар хийж эхэлснээр 40 хувьд хүрсэн. Үүнийг дагаад нөөцөд орсон иргэдийн төрийн албанд томилогдох хувь ч мөн өссөн үзүүлэлттэй байна. Тухайлбал, энэ оны байдлаар нөөцөд орсон иргэдийн 33 хувь нь төрийн албанд шинээр томилогдоод буй. Төрийн албанд орох иргэдийн хүсэл, сонирхол нэмэгдэж буй нь ажиллах нөхцөл сайжирч, цалин хангамж өсөн, хөдөө орон нутагт ажиллахад бүсийн болон орон нутгийн нэмэгдэл, орон сууц авах таатай нөхцөлийн эхлэл тавигдаж байгаатай холбоотой юм” гэв.

Төрийн албаны тухай хуульд оруулсан өөрчлөлтийн дагуу Төрийн албаны ерөнхий шалгалтыг жилд дөрвөн удаа буюу улиралд нэг удаа авахаар болсон. Ингэснээр төрийн албаны сул орон тоо илүү хурдан нөхөгдөж, шалгалт өгөхөөр хүлээж буй иргэдийн хүлээлтийн хугацаа богиносон, цаг хугацаа хэмнэх боломжтойг зохион байгуулагчид онцолж байсан юм.

---