ВИДЕО: Нүүрний арьс шилжүүлэн суулгасан залуу амьдралын төлөө тэмцэж байна

“Face off” буюу “Нүүргүй хүн” уран сайхны киног Жон Вү найруулж, 1997 онд үзэгчдэд хүргэж байжээ. Холливүдын кинонд гардаг шиг нүүрний арьсаа баг мэт солих нь бодит амьдрал дээр боломжтой эсэхэд тухайн үед олон хүн эргэлзсэн байх.

Уг кино дэлгэцэнд гарснаас хойш найман жилийн дараа буюу 2005 онд анх удаа Франц улсад нүүрний арьс солих мэс засал хийж байжээ. Үүнээс хойш дэлхий дээр 40 хүн нүүрээ солиулах мэс засал хийлгэсэн байна.

Эдгээр хүмүүсийн нэг Камерун Андервүд өөрийнхөө тухай олон нийтэд дэлгэхээс эмээгээгүй юм. 26 настай залуугийн тухай CNN агентлаг олон нийтэд танилцуулжээ.

Андервүд нь Калифорнийн Юба хотын иргэн, 2016 онд нүүрлүүгээ буудаж өөрийгөө гэмтээжээ. Доод эрүүнийх нь ихэнх хэсэг, хамраа бүрмөсөн алдсан байна. Түүний ээж сэтгүүл дээрээс Нью-Йоркийн “Лэнгон” эрүүл мэндийн төвийн гоо сайхны мэс заслын дарга, профессор Эдуардо Родригезын талаар уншиж, тус эмнэлэгт ханджээ.

Родригез эмч хагалгаа хийхийг зөвшөөрч, донор бэлэн болтол хагас жил хүлээсний эцэст Андервүдын нүүрийг солих мэс засал хийгдсэн байна. 25 цаг гаруй үргэлжилсэн хагалгаанд 100 гаруй эмч мэргэжилтэн оролцжээ. Родригез эмч өмнө нь нүүр солих хоёр ч хагалгааг амжилттай хийсэн туршлагатай профессор байв.

Өвчтөн Андервүдын донор болсон залууг Уильям Фишер гэдэг 23 настай Нью-Йоркийн иргэн. Кино найруулагч, зохиолч мэргэжилтэй сайн үйлстэн өсвөр насандаа донороор бүртгүүлж, нүүрний арьснаас гадна зүрх, бөөр, элэг, нүд зэрэг бүхий л эрүүл эрхтнээ бусдад өгчээ.

Уильям Фишер /донор/

Фишерийн нүүрийг сольж авсан Андервүдын хагалгаа амжилттай болж, тэрээр хоёр дахь амьдралтайгаа золгосондоо туйлын баяртай байгаагаа илэрхийлж байна. “Хэдийгээр насан туршдаа эм уух хэрэгтэй ч энэ бол итгэл найдварын гэрэл гэгээ”  гэж өвчтөн ярьжээ.

Эх сурвалж: www.cnn.com