Гагнуурчид нэгдэж, нийслэлийн хэмжээнд хүүхдийн тоглоомын талбай, сургууль, цэцэрлэгийн талбайд хугарч, эвдэрсэн тоглоом хэрэгслийг сайн дураараа гагнаж өгнө. Уг аян зургаадугаар сарын 20-27-ны өдрүүдэд өрнөх бөгөөд нэг дүүрэг дээр гурван хүнтэй дөрвөөс зургаан баг ажиллахаар төлөвлөжээ.

Бид уг аяныг санаачлагч Д.Машбатаас тодруулан асуухад “Иргэн хүнийхээ хувьд эмзэглэх үүднээс яг ажлыг санаачилсан. Учир нь хэдхэн минут гаргаад л гагначих юмыг хайхрахгүй орхисноос хүүхдүүд гэмтдэг. Бүр насан туршийн хөгжлийн бэрхшээлтэй ч болдог. Тэгэхээр энэ эзэнгүйдээд орхигдоод байгаа асуудлыг нэг удаа сайн дураар шийдчихье гэж бодсон. Энэ ажилд дор хаяж 100 гагнуурчин хэрэгтэй. Одоогийн байдлаар 80 гаруй гагнуурчин сайн дураараа нэгдэж, ажиллахаар болсон.

Нэг дүүрэгт гурван гишүүнтэй дөрвөөс зургаан баг ажиллуулахаар төлөвлөсөн. Одоогоор эхнээсээ нэгдээд бүртгүүлж байна. Иргэдийн өгсөн мэдээллийн дагуу гагнуурчид очоод гагнаад л явчихна гэсэн үг. Өнөөдрийн байдлаар иргэдээс 40 гаруй дуудлага, мэдээлэл ирээд байна. Хамгийн гол нь зөвхөн гагнаж, будах тул сагсны шийдний гогцоо төмөргүй бол гагнаж чадахгүй. Иймд гагнуулах зүйлсийнхээ дутуу зүйлсийг бэлдчихвэл гагнаад өгнө гэсэн үг. Ер нь бол хүүхэд тоглодог газар бүр хугарсан эвдэрсэн гагнуур шаардлагатай бүхнийг цэгцэлнэ” гэлээ. 

---