Үндэсний аудитын газраас "Цемент шохой" ТӨХК-ийн 2022 оны жилийн эцсийн байдлаарх санхүүгийн байдал, өмчийн өөрчлөлт, мөнгөн гүйлгээний тайланд аудит хийжээ. Тодруулбал, төрд бүрэн шилжсэний дараах санхүүгийн балансыг шалгахад 2022 оны дөрөвдүгээр сарын 1-нээс 2022 оны арванхоёрдугаар сарын 31-ний өдөр хүртэлх санхүүгийн тайлангаас 462 тэрбум 551 сая төгрөгийн зөрчил илэрчээ. Мөн

• гүйцэтгэх захирлын хувийн зардалд 6 сая 400 мянган төгрөг,
• Улаанбаатар дахь оффисын үйл ажиллгаанд батлагдсан төлөвлөгөөнд тусгаагүй 26 сая 900 мянга,
• Хайрхан тахисан, бумбын баярт оролцсон 5 сая 900 мянган төгрөг, 
• Улаанбаатарт ажлын байртай ажилтнуудад Хөтөлөөс Улаанбаатар гэсэн маршрутаар томилолтын зардалд 7 сая 700 мянга,
• Баримтаар нотлогдоогүй ажилчдын хор саармагжуулах гэсэн гүйлгээний 11 сая төгрөг зэрэг нийт 58 сая төгрөгийн үргүй зардлыг гаргажээ.

Ийн үргүй зарцуулсан 58 сая төгрөгийг холбогдох албан тушаалтнаар төлүүлж, Төрийн сан дахь Үндэсний аудитын газрын орлогод төвлөрүүлэхийг даалгасан байна. 

Ташрамд дурдахад, Хөтөлийн "Цемент шохой" үйлдвэрийн хувьчлалыг жил гарны өмнө хүчингүй болгож, төрийн мэдэлд буцаасан билээ. Улмаар үйлдвэрийг Төрийн өмчийн бодлого зохицуулалтын газрын харьяанд "Цемент шохой" ТӨХК болгон өөрчилж, гүйцэтгэх захирлаар нь эдийн засагч Л.Наранбаатарыг томилсон. 

---