Хөгжлийн бэрхшээлтэй иргэд Улаанбаатар төмөр зам ХНН-ийн зорчигчийн галт тэрэг, Автотээврийн үндэсний төв ТӨҮГ-ын орон нутгийн тээвэр, МИАТ ТӨХК-ийн нислэгээр үйлчлүүлэхдээ тарифын хөнгөлөлт үзүүлэхээр болсон талаар Зам, Тээврийн Хөгжлийн Яам(ЗТХЯ)-наас өнөөдөр мэдээлэл хийв.

ЗТХЯ-ны Төрийн нарийн бичгийн дарга С.Батболд:

-Хөгжлийн бэрхшээлтэй иргэдийн салбар зөвлөлөөс санаачлан зорчигчийн галт тэрэг, хот хоорондын тээвэр, МИАТ ТӨХК-ийн нислэгээр хөгжлийн бэрхшээлтэй иргэн үйлчлүүлэхэд 50-90хувь хүртэлх тарифын хөнгөлөлт үзүүлэхээр боллоо.

Өнөөдрөөс эхлэн дараах тарифын хөнгөлөлтийг эдэлнэ. Үүнд, 

-Улаанбаатар төмөр зам ХНН олон улс, орон нутагт хөгжлийн бэрхшээлтэй иргэн зорчиход 60%, харгалзаж яваа хүнд 40% хөнгөлөлт эдлүүлнэ.
-МИАТ ТӨХК-ийн нислэгээр үйлчлүүлэх хөгжлийн бэрхшээлтэй иргэд эмчилгээнд явж байгаа тохиолдолд 50-90%, энгийн зорчих тохиолдолд 50%-ийн хөнгөлөлт үзүүлнэ.
-Авто тээврээр олон улс болон орон нутгийн чиглэлд  хөгжлийн бэрхшээлтэй иргэн жилд нэг удаа нэг чиглэлд үнэ төлбөргүй зорчино.
-Хүннү Эйр компани орон нутаг болон олон улсад зорчих хөгжлийн бэрхшээлтэй иргэнд 15%-ийн хөнгөлөлт үзүүлэх шийдвэр гарлаа. 

Хөгжлийн бэрхшээлтэй иргэдийн тээврээр зорчих эрэлт хэрэгцээг судалсны үндсэн дээрх шийдвэрийг гаргасан гэв. 

 

---