Засгийн газрын 2022 оны 09 дүгээр сарын 28-ны өдрийн 47 дугаар тэмдэглэлээр Улаанбаатар хотын авто замын түгжрэлийг бууруулах зорилгоор “Нийслэл Улаанбаатар хотын авто замын түгжрэл, түүний сөрөг нөлөөллийг бууруулах чиглэлээр хуулийн төслийг боловсруулж танилцуулахыг Монгол Улсын сайд, Нийслэл Улаанбаатар хотын авто замын түгжрэлийг бууруулах Үндэсний хорооны дарга болон Хууль зүй, дотоод хэргийн сайд нарт даалгасан.

Үүний дагуу хуулийн төслийн тандан судалгааг хийж гүйцэтгээд байна. Тандан судалгаагаар Улаанбаатар авто замын түгжрэлийг бий болгож буй хүчин зүйлсийг тодорхойлж, олон улсын туршлагыг харгалзан Улаанбаатар хотын нөхцөлд тохирох зарим арга хэмжээг тодорхойлов.

Тухайлбал, иргэдийн аюулгүй, таатай зорчих нөхцөлийг бүрдүүлэхийн тулд нийтийн тээврийг хөгжүүлэх, нийтийн тээврийн сангийн эрх зүйн үндсийг бүрдүүлэх, сангийн эх үүсвэрийг тодорхойлох боломжтой байна.

Нийслэл Улаанбаатар хотын авто замын түгжрэлийг бууруулах Үндэсний хорооноос “Нийслэл Улаанбаатар хотын авто замын түгжрэл, түүний сөрөг нөлөөллийг бууруулах тухай хуулийн төсөл”-ийг олон нийтээр хэлэлцүүлж, санал авах ажлыг зохион байгуулж  ажиллана.

---