Ховд аймгийн Жаргалант сумын гуравдугаар цэцэрлэгийн багш Д.Ганбаяр нь гарын доорх болон хаягдал материалаар хөгжмийн зэмсэг хийж, хүүхдүүдэд сонирхолтой байдлаар хичээлээ заадаг.

Хувинцар сав, савх, чулуу, бөглөө, шагай, диск гэх мэт гарын доорх материалаар энгийн хөгжмийн зэмсэг хийж, хүүхдийн сонсгол хөгжүүлэхдээ ашигладаг байна. Д.Ганбаяр багш 2003 онд СУИС-ийг бүжигчин мэргэжлээр төгсжээ. Ховд аймгийн хөгжимт драмын театрт мэргэжлээрээ арван жил ажиллаад өөрийн хүсэл сонирхлоор хүүхэд багачуудтай ажиллаж эхэлсэн нь энэ юм. Тэрээр урлагтай ойр өссөн хүүхэд гоо зүйн мэдрэмж, зөв төлөвшил харилцаатай болдог хэмээн онцолж байлаа.

---