Төрийн ордны их танхимд “Улс төр, эдийн засаг, эрх зүйн шийдэл-нийгмийн зөвшилцөл” чуулга уулзалт зохион байгуулагдлаа. Тус чуулганд улс төрийн 32 намын төлөөлөл, иргэний нийгэм, төрийн бус байгууллага, ард иргэдийн төлөөлөл зэрэг 600 гаруй хүн оролцож буй. Уулзалтын үеэр жүжигчин, МУСТА У.Цогтбаяртай ярилцав. 

Жүжигчин У.Цогтбаяр:

-МАН, АН-ыг татан буулгахын төлөө явна гэж бодож байна.

Амьдрал дээрээ жүжиглэдэггүй жирийн л иргэн хүн. Бид анх 40 их наяд гэж ярьж байсан бол 70 их наяд болчихоод байна. Энэ их мөнгө үе үеийн ерөнхийлөгч, ерөнхий сайд, УИХ-ын дарга нартай холбоотой нь ойлгомжтой асуудал. Намайг үзэл бодлоо илэрхийлсний төлөө таван удаа байцаасан. Миний ард хүн байхгүй учраас л би ийм байдалд орчихоод байна.

Надтай хамааралтай ямар нэгэн улс төрийн хүн, хань хамсаатан гэж хүн байхгүй. Миний утсыг шалгасан. Юу ч гараагүй. Миний хувьд сонгуулийн үеэр Х.Нямбаатарын сонгуульд ухуулагчаар ажилласан нь үнэн. Тухайн үед ажилласан цалингаа л авсан. Зөвхөн би биш манай баг нийтээрээ хувааж авсан. Үүнийг маань манай Жижигээ ах, баг хамт олон маань ч гэрчилнэ. Тухайн үед сонгуулийн ажилд зуучилж өгсөн Х.Нямбаатарын дүү н.Батнасанд би дөрвөн сая төгрөг өгсөн. Тэр хүн зуучилж өгснийхөө хариуг нэхсэн. Бидний нүүрсний хулгайн асуудал ярьж байхад ХЗДХ-ийн сайд гарч ирэхээр л уулзсан. Монгол улсын хувьд ХЗДХ-ийн сайдтай тэмцэх хүн байхгүй. Тэнэг болохоороо л би ингээд явж байгаа байх.

Би ХЭҮК-д хандсан. Миний хувьд маш их дарамтад өртсөн гэх тестийн хариу гарсан. Тус газраас намайг төрийн хамгаалалтад авах ёстой гэдэг бичиг гаргаж өгсөн. Гэхдээ би төрийн хамгаалалтад орсноор миний тэмцэл дуусгавар болохыг ойлгосон. Намайг гэж итгэж байгаа олон нийтийнхээ итгэлийг алдахыг хүсээгүй. Би өөрөө гомдолгүй гэж өргөдөл бичээд амь насаа хамгаалуулахаас татгалзсан.

Үзэл бодолгүй зүгээр байнга лайв хийдэг нэгэн болчих вий дээ гэж айж байна.

Мэдлэг боловсролтой Хууль зүйн сайдтай баймаар байна. Улс төрийн мэдрэмжтэй, мэдлэгтэй Ерөнхийлөгч, Ерөнхий сайдтай болмоор байна.

Хүний амь нас яригдаж байна. Айдастай байна. Гэхдээ залуустайгаа тайван замаар зөв тэмцэнэ гэдэгтээ итгэлтэй байна. Бидэнтэй хамт байсан зарим нэг залуус тэмцлээ орхисон. Надад ч гэсэн улс төрийн тохироо хийх санал ихээр тавьж байна. 9911-тэй дугаарууд байнга залгадаг. Би аль ч хүнийх нь саналыг хүлээн аваагүй. Надад өндөр хөгжилтэй улс орнуудад цагаачлах боломжийг ч санал болгосон. Гэхдээ би энэ олон хүний итгэл, сэтгэлийг алдахыг хүсэхгүй байна.

Шантрах зүйл олон байна. Эхнэр болон киноны хамт олон минь л миний ард байна.

Миний хувьд үйлийн үр байдаг гэдэгт итгэдэг. Миний тэмцэл шударга ёсны төлөө учир үр дүнд хүрнэ гэдэгтэй итгэлтэй байна. Эцсийг нь үзнэ. Энэ их олон хүний сайхан сэтгэл надад биш ч гэсэн миний үр хүүхдэд үлдэнэ гэж итгэж байна гэлээ. 

---