Украины НАТО тэргүүтэй холбоотнууд Киевт агаарын довтолгооноос хамгаалах дэвшилтэт системийг нийлүүлнэ гэж зарлажээ.

АНУ, Канад, Франц, Нидерланд улсууд радар болон пуужингууд амлаад байгаа бол ХБНГУ-аас илгээсэн өндөр технологийн нэг систем аль хэдийн Украинд хүрсэн байна. Мөн Их Британи улс Украины мэдээлэл цуглуулах, логистикийн чадавхыг дэмжих зорилгоор агаарын довтолгооноос хамгаалах пуужин, түүнчлэн олон зуун дрон хандивлана гэжээ.

Украины 50 холбоотон орны төлөөлөгчид өнгөрөгч лхагва гарагт Брюссель дэх НАТО-гийн төв байранд уулзаж, ОХУ-ын сүүлийн үеийн халдлагуудын талаар хэлэлцсэн бөгөөд Киев энэхүү дээд хэмжээний уулзалтыг "түүхэн" явдал гэж сайшаасан билээ. Тус уулзалтын дараа АНУ-ын Батлан ​​хамгаалахын сайд Ллойд Остин "Бид украйнчуудыг дайсны халдлагын эсрэг үр дүнтэй хамгаалахын тулд шаардлагатай бүх зүйлээр хангах болно" хэмээн мэдэгджээ.

ОХУ энэ долоо хоногийн эхээр Украины томоохон хотууд руу 100 гаруй пуужин харваж, эрчим хүчний дэд бүтэц болон цэргийн бус объектуудад цохилт өгсөн гэж орон нутгийн албаныхан мэдээлсэн юм. Үүний улмаас 19 хүн амь үрэгдэж, хэд хэдэн хотод тог цахилгаан тасарч, усан хангамж тасалдсан бөгөөд нийслэл Киев хотын эрх баригчид цахилгааны хязгаарлалт хийхээс өөр аргагүй болсон гэжээ.

Украины Ерөнхийлөгч Владимир Зеленский өнгөрсөн хэдэн сарын турш холбоотнуудаасаа агаарын довтолгооноос хамгаалах системийн тусламж хүсэж, Украинд "агаарын бамбай" бий болгохыг уриалж байсан билээ. Харин ОХУ-ын эрх баригчид Украины холбоотнуудыг Киевт дэвшилтэт зэвсэг нийлүүлэхгүй байхыг удаа дараа анхааруулж, ингэснээр тэд дайны оролцогч болно гэж онцлон тэмдэглэсэн юм.

Эх сурвалж: BBC

---