"Запорожье" АЦС-ыг ОХУ-ын төрийн өмч болгожээ

Ерөнхийлөгч Владимир Путин Украины өмнөд хэсгийн Энергодар хотод орших "Запорожье" атомын цахилгаан станцын бүх байгууламжийг ОХУ-ын төрийн өмчийн жагсаалтад оруулах зарлиг гаргажээ.

Өнгөрөгч лхагва гарагт нийтлэгдсэн уг тогтоолд "Оросын Засгийн газар Запорожье атомын цахилгаан станц болон түүний үйл ажиллагаанд шаардлагатай бусад байгууламжийг холбооны эзэмшилд оруулах арга хэмжээ авна" гэжээ. Ерөнхийлөгч Путин мөн "Запорожье" АЦС-ыг хариуцсан холбооны нэгдсэн компани байгуулж, хөрөнгийнх нь аюулгүй байдлыг хангахыг Засгийн газарт даалгасан байна.

Түүнчлэн, тус станц болон ажилчдад нь өнгөрөгч есдүгээр сарын 30-наас өмнө олгосон зөвшөөрлийг ОХУ-ын хууль тогтоомжийн дагуу шинээр олгох хүртэл хүчинтэй байлгах аж. Мөн "Балаково" АЦС-ын Ерөнхий инженер асан Олег Романенко "Запорожье" АЦС-ын ашиглалтын компанийг удирдана гэж Оросын төрийн мэдлийн "Росэнергоатом" компани мэдэгджээ.

Харин Олон улсын атомын энергийн агентлагийн тэргүүн Рафаэль Мариано Гросси тус станцын ойролцоох цөмийн аюулгүй байдал, хамгаалалтын бүс байгуулах асуудлыг хэлэлцэхээр Украины нийслэл Киевийг зориод байна.

On our way to Kyiv for important meetings. The need for a Nuclear Safety and Security Protection Zone (NSSPZ) around #Zaporizhzhya Nuclear Power Plant is now more urgent than ever. pic.twitter.com/XFetpJ65ai

— Rafael MarianoGrossi (@rafaelmgrossi) October 5, 2022

Эх сурвалж: TASS